რატომ არის მნიშვნელოვანი: გუშინ, 30 მაისს ფოტოგრაფმა, ზურაბ ცერცვაძემ გაავრცელა ინფორმაცია, რომ მისი ფოტო, რომელიც მარტის აქციების სიმბოლოდ იქცა, ევროკავშირის თემაზე სამთავრობო კონკურსში არ მიიღეს.

  • ფოტო რუსული კანონის საწინააღმდეგო აქციაზე გადაღებული. მასზე ჩანს პოლიციის წყლის ჭავლის წინ მდგომი ქალი (ნანა მალაშხია) რომელიც ევროკავშირის დროშას აფრიალებს.
  • კონკურსს ნატოსა და ევროკავშირის შესახებ საინფორმაციო ცენტრი ატარებდა.
  • "ვიფიქრე, გავგზავნი... დღეს მომწერეს, კონკურსიდან ჩაგხსენით, ფოტომ ჩვენი კრიტერიუმები ვერ დააკმაყოფილაო", — წერდა ფოტოგრაფი.

დეტალები: ცენტრი წერს, რომ კონკურსში, მე ვხედავ ევროპას, მონაწილეობა 100-მდე მოყვარულმა ფოტოგრაფმა მიიღო, ჟიურიმ 13, აქამდე უცნობი ნამუშევარი შეარჩია.

  • "მიზნად ისახავდა საქართველოს მოქალაქეების მხრიდან ქვეყნის ევროპული ინტეგრაციის თემაზე მათ მიერ განცდილი და ფოტო კამერით დანახული დამოკიდებულების ასახვას".
  • ამის შემდეგ კი ამბობენ, რომ ზურაბ ცერცვაძის ფოტოს არშერჩევას მისი მხრიდან "უსაფუძვლო და მწვავე კრიტიკა, პოლიტიზირება და სხვა მონაწილეების "უმწვავესი ბულინგი" მოჰყვა.
  • ასევე, საუბრობენ იმ "მიზეზებზე", რის გამოც ფოტო კონკურსიდან ჩაიხსნა.
  • "ნამუშევარი ბოლო პერიოდში სარგებლობდა მაღალი ცნობადობით, როგორც ადგილობრივ, ასევე საერთაშორისო საზოგადოებასა და წამყვან მედია გამოცემებში. მას მიღებული აქვს არა ერთი საპატიო ჯილდო და მოპოვებული აქვს საერთაშორისო აღიარება. შესაბამისად, ჟიურის გადაწყვეტილებით, ეს ნამუშევარი სრულიად არათანაბარ პირობებში აყენებდა სხვა კონკურსანტებს, რის საფუძველზეც ის არ იქნა შერჩეული".

საინფორმაციო ცენტრი სამთავრობო ორგანიზაციაა. ცენტრის დირექტორი თამარ წულეისკირია, მისი ქმარი კი ქართული ოცნების დეპუტატი, ლევან კობიაშვილი.

  • კობიაშვილი ერთ-ერთია იმ დეპუტატებს შორის, რომელმაც რუსულ კანონს მხარი დაუჭირა, რასაც საზოგადოების კრიტიკა მოჰყვა.
  • წულეისკირი ქმარს ფეისბუქგვერდზე გამოექომაგა და ითხოვდა, რომ friend-ებიდან წაეშალათ მათ, ვისაც მისი ქმარი მოღალატე ჰგონია.