"ეს "აცე ვიროს" შანტაჟი უნდა შემწყდარიყო იმისთვის, რომ ჩვენსა და ევროკავშირს შორის დისკუსია გადასულიყო საქართველოსთვის და საქართველოს ევროინტეგრაციის ინტერესებისთვის საუკეთესო გზაზე", — ამის შესახებ საქართველოს პარლამენტის თავმჯდომარის მოადგილემ, თეა წულუკიანმა გადაცემაში იმედი LIVE-ის ეთერში განაცხადა. მისი თქმით, ევროკავშირმა უნდა შეწყვიტოს შანტაჟის ენით საუბარი საქართველოსთან და დაიწყოს საქმიანი დისკუსია. სწორედ ამას ემსახურებოდა საქართველოს ხელისუფლების ნაბიჯი.

"ყველგან არის ის თუ რა პირობებში ამყოფებდა ევროკავშირი ჩვენს ხელისუფლებას. მუდმივი შანტაჟისა და წნეხის ქვეშ. დაახლოებით ისეთის, რომელსაც მე ვეძახი "აცე ვიროს პრინციპს". "აცე ვირო და მოგცემ, პატარა თივას ჩაგიდებ პირში". შესაბამისად, ეს "აცე ვიროს" შანტაჟი უნდა შემწყდარიყო იმისთვის, რომ ჩვენსა და ევროკავშირს შორის დისკუსია გადასულიყო საქართველოსთვის და საქართველოს ევროინტეგრაციის ინტერესებისთვის საუკეთესო გზაზე.

ეს ხელისუფლება არსად მიდის იმიტომ, რომ მას ხმა მისცა მილიონ ასი ათასზე მეტმა ადამიანმა. ამიტომ ევროკავშირს მოუწევს ამ ხელისუფლებასთან საუბარი და ეს უნდა იყოს შანტაჟისგან დაცლილი, საქმიანი დისკუსია. ამიტომაც ითქვა ის, რაც ითქვა", — განაცხადა თეა წულუკიანმა.