კვლევის თანახმად, ჭარბწონიანობას ხელს ნაწლავებიდან ტოქსიკური ნივთიერებების გაჟონვაც შეიძლება უწყობდეს. შესაძლოა, ახალი მიგნებები სამომავლოდ წონის რეგულირებაში დაგვეხმაროს. ნაშრომი ჟურნალში BMC Medicine გამოქვეყნდა.

ნაწლავებში ბაქტერიათა ფრაგმენტები გვხვდება, რომელთაც ენდოტოქსინები ეწოდება. ეს ნივთიერებები მომნელებელი ტრაქტის ეკოსისტემის ჩვეულებრივი ნაწილია, თუმცა მიკრობულმა ნამსხვრევებმა სხეულს მნიშვნელოვანი ზიანი შეიძლება მიაყენოს, თუკი სისხლის მიმოქცევაში მოხვდება.

ასევე იხილეთ: რატომ იმატებს ზოგიერთი ადამიანი წონაში სხვებზე მარტივად — მაშინ, როცა საჭმლის ულუფები ერთნაირია

ამ შემთხვევაში ნაშრომის ავტორებს სურდათ გამოეკვლიათ, თუ რა გავლენა აქვს ენდოტოქსინებს ცხიმოვან უჯრედებზე, ანუ ადიპოციტებზე, ადამიანებში. დაადგინეს, რომ აღნიშნული ტოქსინები ცხიმის დაგროვების მაკონტროლებელ პროცესებზე ზემოქმედებს.

კვლევა 156 ცდისპირზე ჩატარდა. აქედან 63 სიმსუქნით დაავადებული იყო, 26-ს კი ბარიარტრიული ოპერაცია ჰქონდა ჩატარებული. მეცნიერებმა თეთრი და ყავისფერი ცხიმოვანი უჯრედები შეისწავლეს.

ამ ორს შორის განსხვავება ისაა, რომ თეთრი ადიპოციტები მეტ ლიპიდს ინახავს, ყავისფრები კი — ცხიმს ენერგიად გარდაქმნის. დადგენილია, რომ ენდოტოქსინები თეთრი ცხიმოვანი უჯრედების ყავისფრის მაგვარ უჯრედებად გადაქცევას აფერხებს, რაც ცხიმის წვასაც უშლის ხელს.

საგულისხმოა ისიც, რომ, მიგნებების თანახმად, სიმსუქნით დაავადებულებში ნაწლავებიდან ენდოტოქსინები უფრო მარტივად იპარება, რაც ცხიმოვანი უჯრედების ფუნქციონირებას დამატებით აფერხებს.

ავტორები აღნიშნავენ, რომ ბარიარტრიული ოპერაცია ორგანიზმში ენდოტოქსინებს ამცირებს, რაც ცხიმოვანი უჯრედების ფუნქციონირებას უწყობს ხელს. ეს წონის კონტროლის მხრივ ამ მეთოდის მნიშვნელობას კიდევ ერთხელ უსვამს ხაზს.

მსოფლიოში ჭარბი წონის პრობლემა დღითიდღე უფრო აქტუალური ხდება. შესაბამისად, მნიშვნელოვანია, წონის რეგულაციასთან დაკავშირებული ყველა ფაქტორი გავითვალისწინოთ, რათა საპასუხოდ მოქმედება შევძლოთ.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.