ამის შესახებ ინფორმაციას დროა ავრცელებს.

რატომ არის მნიშვნელოვანი: ყვარელში, სასტუმრო ყავრლის ტბასთან საპროტესტო აქცია დილიდან იმართება, სადაც ლავროვის სიძის, ალექსანდრ ვინოკუროვის ძმა, მიკა ვინო, იგივე მოშე ვინოკუროვი ქორწილს იხდის.

  • ადგილზე მობილიზებულები იყვნენ შინაგან საქმეთა სამინისტროს წარმომადგენლების დიდი რაოდენობა, მათ შორის, ნიღბიანი სამართალდამცავები.
  • ისინი ძალის გამოყენებით აკავებდნენ აქციის მონაწილეებს და ტერიტორიიდან გაჰყავდათ.
  • დროას წევრის, თამთა გოგოლაძის თქმით, გუშინ ელენე ხოშტარია თელავის პოლიციასთან დააკავეს.
  • მოგვიანებით გაირკვა, რომ ელენე ხოშტარია ავჭალაში, ხოლო სხვა დაკავებულები კახეთის სხვადასხვა იზოლატორშია გადაყვანილი.

დეტალები: დროამ გაავრცელა ელენე ხოშტარიას დღევანდელი კომენტარი, სადაც ამბობს, რომ "მონურ სასამართლოზე მისვლას" არ აპირებს.

  • "ეს არის რუსული რეჟიმის მსახურთა დაჯგუფება. ამიტომ არც მე და არც ჩემი ადვოკატი არ ითანამშრომლებს ამ სისტემასთან. იზოლატორში ყოფნის არანაირი პრობლემა არ მაქვს", — ამბობს ხოშტარია.
  • პარტიაში ამბობენ, რომ მასთან იმყოფებოდა ISFED-ის ადვოკატი, თეონა კილაძე და ადვოკატის თქმით, ელენე უარს ამბობს თელავში სასამართლო პროცესში მონაწილეობაზე.
  • "საქართველოს კანონმდებლობის მიხედვით, დღეს 16:37 საათამდე, შინაგან საქმეთა სამინისტრომ პარტია დროას დამფუძნებელი უნდა გაათავისუფლოს პატიმრობიდან ან მოითხოვოს დაკავების ვადის გაგრძელება 24 საათით", — ნათქვამია განცხადებაში.
  • მათი თქმით, შსს-ს ასევე აქვს შესაძლებლობა, ხელწერილის საფუძველზე დაუყოვნებლივ გაათავისუფლოს ელენე ხოშტარია.