რატომ არის მნიშვნელოვანი: 17 მაისი ჰომოფობიასთან, ბიფობიასთან და ტრასნფობიასთან ბრძოლის (IDAHOBIT) საერთაშორისო დღეა.

  • ამ დღეს მსოფლიოს არაერთ ქვეყანაში ლესბოსელი, გეი, ბისექსუალი, ტრანსგენდერი და ქვიარ ადმიანები ეკონომიკური და სოციალური თანასწორობისთვის საბრძოლველად გამოდიან, თუმცა, საქართველოში 17 მაისს თემის წარმომადგენლები სიძულვილს, აგრესიასა და ძალადობას აწყდებიან.
  • 2013 წლის 17 მაისის შემდეგ, როცა სასულიერო პირებმა და მრევლმა მშვიდობიანი მოქალაქეები დაარბიეს, ყოველ წელს, ამ დღეს საპატრიარქო აქცია-მსვლელობებს ატარებს და მას "ოჯახის სიწმინდის დღეს" უწოდებს.
  • ჰომოფობები ამტკიცებენ, რომ ლგბტქ ადამიანებს საქართველოში არავინ ჩაგრავს, თუმცა ეს მართალი არ არის — ძალადობის არაერთი ფაქტი ვიცით და კიდევ ბევრი უცნობია.
  • ქვეყანაში ადამიანებს ჩაგრავენ მათი სექსუალური ორიენტაციისა თუ გენდერული იდენტობის გამო, უზღუდავენ წვდომას კერძო საკუთრებაზე, ძალადობენ ფიზიკურად და კლავენ.
  • 5 ივლისს ლგბტ თემს ღირსების მარშის გამართვის საშუალება არ მიეცა, რადგან ჰომოფობიურმა და ძალადობრივმა ჯგუფებმა კონტრაქცია გამართეს და ჯერ კიდევ აქციის დაწყებამდე მედიის წარმომადგენლებზე იძალადეს — ძალადობის ორგანიზატორები დღემდე არ დასჯილან.

დეტალები: კალაძემ დედაქალაქის მთავრობის სხდომა სწორედ ე.წ ოჯახის სიწმინდის დღის მილოცვით დაიწყო, თუმცა არაფერი უთქვამს იმაზე, რომ 17 მაისი ჰომოფობიასთან ბრძოლის დღეა.

  • მისი მტკიცებით, ეს დღე არის "სიმბოლო ოჯახისა და ქვეყნის ერთიანობის".
  • "ოჯახის მნიშვნელობაზე არ დავიწყებ ახლა ახსნა-განმარტებების გაკეთებას, სიღრმეებში შესვლას, ყველამ ვიცით, რამდენად მნიშვნელოვანია და რა თქმა უნდა, მინდა ჩვენი ქვეყნის ყველა მოქალაქეს მივულოცე დღევანდელი დღე", — თქვა მან.

კალაძის ჰომოფობია: ეს პირველი შემთხვევა არ არის, როდესაც მერი ლგბტ თემის წევრებზე ძალადობას უგულებელყოფს.

  • მაგალითად 2021 წლის 7 ივლისს, მას შემდეგ, რაც ძალადობრივმა ჯგუფებმა ლგბტ თემს ღირსების გამართვის საშუალება არ მისცეს და მოქალაქეებზე, მათ შორის, ჟურნალისტებზეც იძალადეს, კალაძე ამტკიცებდა, რომ სექსუალური ორიენტაციის გამო ქვეყანაში არავის დევნიან.
  • მანამდე კი ამბობდა, რომ პრაიდის კვირეულის ჩატარება "მიზანმიმართულად არ მიაჩნია".

კონტექსტი: ქართული ოცნების რიტორიკა და სიძულვილის ენა უკვე დიდი ხანია, რაც თემის მიმართ ძალადობას ახალისებს, თუმცა ეს რიტორიკა განსაკუთრებით ბოლო პერიოდში გაძლიერდა.

  • მაგალითად, 5 მაისს უნგრეთში გამართული კონსერვატორთა კონფერენციაზე ტრიბუნა ღარიბაშვილმა სწორედ ჰომოფობიური გზავნილების გასავრცელებლად გამოიყენა.
  • პრემიერმინისტრის ჰომოფობია მაშინვე შეაქეს მმართველ პარტიაში.