თბილისის მერს და ქართული ოცნების გენერალურ მდივანს, კახა კალაძეს ჰგონია, რომ საქართველოში ლგბტ თემის უფლებები არ ილახება. კალაძე ამტკიცებს, რომ სექსუალური ორიენტაციის გამო ადამიანებს არავინ დასდევს, მათ არ აგდებენ სამსახურიდან და ყველა სერვისზე მიუწვდებათ ხელი, რაც სიმართლეს არ შეესაბამება. საქართველოში არაერთი ადამიანზე უძალადიათ და მოუკლავთ სექსუალური თუ გენდერული იდენტობის გამო, მათ უჭირთ სამსახურის დაწყება და სერვისების მიღებაც.

კალაძე ამტკიცებს იმასაც, რომ ჰომოფობი არ არის, თუმცა იქვე ჰომოფობიის წამახალისებელ განცხადებებს აკეთებს.

"ჩვენს ქვეყანაში ყველა ადამიანის უფლება არის დაცული, მიუხედავად სარწმუნოებისა, სექსუალური ორიენტაციისა. არავის არ დასდევენ, არავის არ ეკიდებიან თავისი სექსუალური ორიენტაციის ან სარწმუნოების გამო ქვეყანაში. სამწუხარო არის ის ფაქტი, მე რამდენიმე დღის წინ დავაფიქსირე პრაიდთან დაკავშირებით დამისვეს შეკითხვა და ამასთან დაკავშირებით გამოვთქვი ჩემი მოსაზრება, რომ არ მიმაჩნია მიზანშეწონილად, თქვენ ვერ წარმოიდგენთ რამხელა აგრესია მოყვა. მე არავისთვის შეურაცხყოფა არ მიმიყენებია, არასდროს ვერავინ ვერ ნახავს ჩემს ჰომოფობიურ განცხადებებს.

ეს ადამიანები, განსხვავებული სექსუალური ორიენტაციის მქონე ადამიანები, მოდით შევხედოთ რეალობას, ისინი ცხოვრობენ ჩვენს ქვეყანაში, საზოგადოების ნაწილია, წლების წინაც ასე იყო, დღესაც არსებობენ ეს ადამიანები და ალბათ, მომავალშიც იარსებებენ, ხო. ისინი ჩვეულებრივი ადამიანები არიან, როგორც ჩვენა ვართ — ორი ფეხი აქვთ, ორი ხელი აქვთ, მუშაობენ, თავიანთი სექსუალური ორიენტაციის გამო არავინ არ აგდებს სამსახურიდან, ისევე სარგებლობენ იმ პროგრამებით, იმ სერვისებით, როგორც ჩვენ ყველანი. შესაბამისად, ის, რომ ვიღაცის უფლებებს არღვევენ..."

დამაზუსტებელ კითხვაზე, ირღვევა თუ არა ლგბტ თემის უფლება, როცა ისინი შეკრებას და აქციის გამართვას ვერ ახერხებენ, კალაძე ჰომოფობიური ჯგუფებისთვის დამახასიათებელი ფრაზით პასუხობს:

"ნახეთ, მანდაც არსებობს, გამოხატვის თავისუფლება აქვს ყველა ადამიანს და არსებობს პასუხისმგებლობა, რომ შენი გამოხატვის თავისუფლებით სხვისი უფლებები არ უნდა დაირღვეს".

კიდევ ერთ დამაზუსტებელ კითხვაზე, ვისი უფლებები დაირღვა ლგბტ თემის გამოხატვის თავისუფლებით, კალაძე ჰომოფობიური შინაარსის ფრაზით პასუხობს:

"ზოგადად, მე როდესაც ვთქვი, რომ არ მიმაჩნია მიზანშეწონილად პრაიდის ჩატარება, თუმცა ეს ადამიანები არსებობენ და მათ ჩვეულებრივად აქვთ ცხოვრების შესაძლებლობა ყოველგვარი პრობლემების გარეშე, არავინ არ დასდევს, არავინ არ ლახავს მათ უფლებებს.

ამ მიმართულების პოპულარიზაცია, პროპაგანდა მე არ მიმაჩნია მიზანშეწონილად. ეს არის ჩემი მოსაზრება", — აცხადებს ის.

ჰომოფობები ამტკიცებენ, რომ ამ ადამიანებს საქართველოში არავინ ჩაგრავს, თუმცა ეს მართალი არ არის. ლგბტქ ადამიანებზე ძალადობის არაერთი ფაქტი ვიცით და კიდევ ბევრი უცნობია. ქვეყანაში ადამიანებს ჩაგრავენ მათი სექსუალური ორიენტაციისა თუ გენდერული იდენტობის გამო, უზღუდავენ წვდომას კერძო საკუთრებაზე, ძალადობენ ფიზიკურად და კლავენ.

5 მარტს ლგბტ თემს ღირსების მარშის გამართვის საშუალება არ მიეცა, რადგან ჰომოფობიურმა და ძალადობრივმა ჯგუფებმა კონტრაქცია გამართეს და ჯერ კიდევ აქციის დაწყებამდე მედიის წარმომადგენლებზე იძალადეს. დაშავდა 53 ადამიანი.

გარდა ამისა, მოძალადეებმა ყურსაკიდის ტარების გამო, ჰომოფობიური მოტივით დაჭრეს ტურისტი და შეურაცხყოფა მიაყენეს არაერთ ადამიანს, მათ შორის, საცემრად დასდევდნენ ბავშვებს.

გუშინ, 6 ივლისს კი ძალადობრივი ჯგუფები თავს დაესხნენ ტრანსგენდერებსა და რამდენიმე აქტივისტს და მათზე ფიზიკურად იძალადეს. ერთ-ერთ დაშავებულს სახის ძვალი აქვს გატეხილი.

გაიგეთ მეტი: