სავაჭრო ცენტრ "სითი მოლი საბურთალოს" მიმდებარე ტერიტორიაზე გადაადგილების ახალი სქემა ამოქმედდა.

როგორც თბილისის მერიის ტრანსპორტისა და ურბანული განვითარების სააგენტო აცხადებს, ცვლილების მიზანია სატრანსპორტო ნაკადების მოწესრიგება, ორგანიზება და გამიჯვნა, რათა შემცირდეს კონფლიქტური მანევრები, ქვეითთა გადაადგილებისა და საგზაო მოძრაობის უსაფრთხოების გაუმჯობესება.

მოძრაობის ახალი სქემის თანახმად, მეტროსადგურ "დელისიდან" მოძრაობისას სავაჭრო ცენტრის წინ გზაჯვარედინზე პირველივე შესახვევში მარცხნივ მოხვევით მოძრაობა შესაძლებელია როგორც ქავთარაძის ქუჩის, ისე ყაზბეგის გამზირისკენ.

მეტროსადგურ "ვაჟა-ფშაველას" მხრიდან მომავალ ავტომანქანებს კი აღნიშნულ შემოსახვევში გადასვლის საშუალება აქვთ, საიდანაც ქავთარაძის ქუჩაზე მოხვდებიან. ყაზბეგის გამზირის მიმართულებით მოძრაობა დასაშვები იქნება "სითი მოლის" წინ არსებული შემოსახვევიდანაც.

ამასთან, ვაჟა-ფშაველას გამზირზე, თავხელიძის ქუჩიდან "სითი მოლის" მიმართულებით მოეწყო საზოგადოებრივი ტრანსპორტის ზოლი. თითოეული მიმართულებით შენარჩუნდა ორ-ორი სამანქანო ზოლი. გზაჯვარედინზე მოეწყო შუქნიშნით რეგულირებული ქვეითთა გადასასვლელები, რომელიც საზოგადოებრივი ტრანსპორტის გაჩერებას უკავშირდება.

ტრანსპორტისა და ურბანული განვითარების სააგენტო აცხადებს, რომ ახალი სქემის ამოქმედების დღიდან შესაბამისი სამსახურები აკვირდებიან ნაკადების მოძრაობას.