საქართველოს პრემიერმინისტრმა, რომელიც დღეს, 5 მაისს უნგრეთის დედაქალაქში მიმდინარე კონსერვატორთა კონფერენციიის ერთ-ერთი სპიკერი იყო, ეს საერთაშორისო ტრიბუნა ჰომოფობიური განცხადებებისთვის გამოიყენა.

რას ამბობენ ოცნებაში: მას შემდეგ, რაც ღარიბაშვილმა უნგრელ კოლეგას, პრორუს ვიქტორ ორბანს შეასხა ხოტბა, პრემიერმინისტრი საკუთარ ქვეყანაში უკვე თანაგუნდელებმა აქეს.

• დეპუტატი ალუდა ღუდუშაური ფიქრობს, რომ ეს "ღირსეული ქვეყნის ღირსეული პრემიერმინისტრის გამოსვლა იყო".
• "პრემიერის გამოსვლაში ჩვენ ვხედავთ, რომ საქართველოს ბოლო ათწლეულების პერიოდში რამე აკლდა, დღეს დავინახეთ ის, რომ საქართველოს ხელისუფლება დგას ქართველ ხალხთან, საკუთარ ხალხთან და საკუთარ ქვეყანასთან ერთად".
• მას არ ჩამორჩა მამუკა მდინარაძე. მისი თქმით, "არაფერია იმაზე ეროვნული და ევროპული, ვიდრე საკუთარ ქვეყანაზე ზრუნვა". პარტიის აღმასრულებელი მდივნის აზრით, ღარიბაშვილის სიტყვა "სწორედ ამ პათოსით იყო გაჟღენთილი".
• მდინარაძე მხოლოდ ამით არ დაკმაყოფილდა და ორბნის გამართლებაც კი სცადა.
• კერძოდ, ორბანმა თქვა, რომ ღარიბაშვილისგან შეგვიძლია ვისწავლოთ, "როგორ მოახერხოს პატარა ქვეყანამ რუსეთის ჩრდილში ცხოვრება".
• მდინარაძე "დარწმუნებულია", რომ ორბანმა ამ სიტყვებში რუსეთის მეზობლად ცხოვრება იგულისხმა.
• ღარიბაშვილის ჰომოფობიის გამართლება სცადა გია ვოლსკიმაც. როგორც ის ამტკიცებს, ღარიბაშვილის განცხადების მთავარი აზრი ის იყო, რომ არც უმრავლესობამ და არც უმცირესობამ არ უნდა გადადგას განზრახ საწინააღმდეგო აქციები, რათა ქვეყნის ინტერესები არ დააზიანოს.
• შემდეგ კი ირწმუნება, რომ საქართველოში ნებისმიერი უმცირესობა დაცულია კანონით.

კრიტიკა ოპოზიციისგან: ევროპული საქართველოს ლიდერი გიგა ბოკერია ღარიბაშვილს მატყუარა ფარისეველს უწოდებს, რომელიც ყველაფერს აკეთებს ივანიშვილის ძალაუფლებისთვის და არაფერს ეროვნული ინტერესებისთვის.

• "კონსერვატორები მოატყუა, თითქოს კონსერვატორია და საქართველოში იცავს კონსერვატიულ ღირებულებებს, თითქოს საქართველოში დისკუსიაა ბავშვების გენდერის გამოცვლაზე".
• "იესო ქრისტე ამბობს სახარებაში: ბიძინას ტუტუცი ბუდაპეშტშიც ბიძინას ტუტუცია", — ასე გამოეხმაურა გირჩი — მეტი თავისუფლების ლიდერი, ზურაბ ჯაფარიძე ღარიბაშვილის გამოსვლას.
• ღარიბაშვილის სიტყვა მორიგ სიყალბედ შეაფასა ლელოს დეპუტატმა, ანა ნაცვლიშვილმა.
• "ოჯახზე, დედებზე, ბავშვებზე და აი, ასეთ კარგ რაღაცებზე ბუდაპეშტში საუბარს ურჩევნია, 20 ნაბიჯი ჩამოიაროს თავისი კაბინეტიდან და მისი კაბინეტის წინ მეორე კვირაა, დედები, რომლებმაც ოჯახები დატოვეს და შვილების გადასარჩენად იძულებულები არიან, ღამე ათიონ კანცელარიის წინ. აი, მანდ რომ გაიხსენოს ოჯახის სიწმინდე".

რატომ არის მნიშვნელოვანი: კონფერენცია დევიზით — "ერთად ჩვენ ძლიერები ვართ" — ძირითადად ამერიკელი და ევროპელი კონსერვატორების მონაწილეობით იმართება, რადგან, როგორც AP წერს, ევროპაში იზოლირებული უნგრეთის პოპულისტური მთავრობა მოკავშირეებს და თანამოაზრეებს ეძებს.

• თავად ორგანიზატორები ამბობენ, რომ ეს შეხვედრა "ფოკუსირებული იქნება ლიბერალების კოშმარზე: ეროვნული ძალების საერთაშორისო გაერთიანებაზე".
• ჰომოფობიასთან ერთად, ღარიბაშვილს არც პოპულიზმი დაუკლია და ტრადიციების, სამშობლოს, ოჯახისა და სარწმუნოების დაცვის მოტივით, არაერთი განცხადება გააკეთა, რომელიც კარგად ნაცნობ პროპაგანდისტულ ელემენტს შეიცავდა.

• კარგად ნაცნობს იმიტომ, რომ ამ მესიჯბოქსებს კრემლის პროპაგანდისტული მედია არაერთი წელია ავრცელებს, ბოლო წლებში კი ამ ფუნქციას საქართველოში ქართული მარში, ალტინფო და პოსტივი ითავსებენ.