პარლამენტის თავმჯდომარე, შალვა პაპუაშვილი ოპოზიციის მიერ 2024 წლის საპარლამენტო არჩევნების შემდეგ დაწყებული „უწყვეტი პროტესტის“ მიმდინარეობას ვრცლად მიმოიხილავს და წერს, რომ რუსთაველის პროტესტის მონაწილეები "ფსევდორელოგიურ ფუნდამენტალისტურ სექტად" ჩამოყალიბდნენ.

"2024 წლის საპარლამენტო არჩევნების ჩატარებიდან თითქმის 700 დღე გავიდა. ეს 100 კვირაა.

არჩევნები, რომლებიც ოპოზიციის ნაწილმა რეფერენდუმად გამოაცხადა, მათთვის სასურველი შედეგით არ დასრულდა. შედეგის არცნობას ქუჩის მორიგი პოლიტიკური პროცესი მოჰყვა, რომელსაც მოგვიანებით მარკეტინგულად "უწყვეტი პროტესტი" უწოდეს.

ოპოზიციური დღეთაღრიცხვით დღეს "პროტესტის" 666-ე დღეა. ეს მრგვალი თარიღი კარგი შესაძლებლობაა, რომ საფუძვლიანად აღვწეროთ, თუ როგორ გარდაიქმნა პოლიტიკური პროტესტის აქტივისტთა ჯგუფი ფსევდორელიგიურ მოძრაობად და როგორ მივიღეთ თითქოს ტრადიციული კამპანიიდან საკუთარი რიტუალების, სიმბოლოების, კალენდრისა და შიდა მორალური წესრიგის მქონე აგრესიული თემი — ფსევდორელოგიური ფუნდამენტალისტური სექტა", — წერს პაპუაშვილი.

ეს არ არის პირველი შემთხვევა, როცა მან პროტესტის მონაწილეებს "ფსევდორელიგიური სექტა" უწოდათ. 21 სექტემბერს გამართულ ბრიფინგზე პაპუაშვილმა განაცხადა, რომ "ბაბლს" რომ უწოდებენ საკუთარ თავს ხანდახან, სინამდვილეში ეს ტერმინი შემოტანილია იმისთვის, რომ შეალამაზონ ამ ერთობის არსი, რადგან ეს, სინამდვილეში, ფსევდორელიგიური სექტაა".