ინფორმაციას საქართველოს დემოკრატიული ინიციატივა (GDI) ავრცელებს, რომელიც სასამართლოში მედიის ინტერესებს იცავდა.

რატომ არის მნიშვნელოვანი: ორგანიზაციის შეფასებით, მსგავსი ცილისწამების საქმეზე მორალური ზიანის ასანაზღაურებლად მედიისთვის დაკისრებული თანხა არაგონივრულად მაღალია იმ ზიანთან შედარებით, რომელიც შესაძლოა, აფხაზეთის ავტონომიური რესპუბლიკის იძულებით გადაადგილებულ პირთა მინისტრს, ირაკლი კობახიძის სიძეს, დავით ფაცაციას განეცადა.

  • GDI-ში ამბობენ, რომ გადაწყვეტილება ქმნის განსაკუთრებით საშიშ პრეცედენტს, რადგან არსებობს მოლოდინი, რომ საჯარო პირების მხრიდან გაიზრდება სიტყვისა და გამოხატვის თავისუფლების მართლმსაჯულების ობიექტად ქცევის შემთხვევები.
  • "ამასთან, იგი მეტად უწყობს ხელს "მსუსხავი ეფექტის" და შესაბამისად, შიშის გაძლიერებას საზოგადოებაში, რომ ხელისუფლების ნებისმიერი კრიტიკა შეიძლება, დაექვემდებაროს პასუხისმგებლობას", — აცხადებენ ორგანიზაციაში.

დეტალები: ფაცაცია სადავოდ ხდიდა TV პირველზე გაჟღერებულ განცხადებებს, რომლებიც უკავშირდება სახელმწიფო აუდიტის სამსახურის დასკვნებს სამინისტროში გამოვლენილ დარღვევებსა და თანხების არამიზნობრივ ხარჯვაზე.

  • მედიაში გაჟღერებული ინფორმაციით, "არამიზნობრივად დახარჯული თანხების კვალი სამინისტროს ხელმძღვანელამდე", დავით ფაცაციამდე მიდის.
  • მოპასუხე მხარე კი უთითებდა, რომ გაკეთებული განცხადებები იყო შეფასებები, რომლებიც ეყრდნობოდა აუდიტის დასკვნას.

GDI-ის ინფორმაციით, ფაცაცია თავდაპირველად კომპენსაციის სახით ერთ ლარს ითხოვდა, შემდეგ კი თანხა 30 000 ლარამდე გაზარდა.

  • "სასარჩელო მოთხოვნის გაზრდა დაემთხვა ერთი კვირით ადრე კახა კალაძის სარჩელის დაკმაყოფილებასა და საქმეში მოპასუხეებისთვის მორალური ზიანის ანაზღაურების დაკისრებას, ასევე, თბილისის სააპელაციო სასამართლოს მიერ უჩა მამაცაშვილის სარჩელის დაკმაყოფილების შესახებ გადაწყვეტილების ძალაში დატოვებას", — აცხადებენ ორგანიზაციაში.
  • მათივე თქმით, კითხვაზე, რატომ გადაწყვიტა მოთხოვნის გაზრდა, მინისტრმა სასამართლო პროცესზე ღიად განაცხადა, რომ სურდა, მედია და ჟურნალისტები გაკეთებული განცხადებებისთვის დაესაჯა.