რატომ არის მნიშვნელოვანი: რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს.

  • როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ;
  • ხოლო როცა მცირდება — უიაფდებათ;
  • გაძვირებული სესხების პირობებში ადამიანები ამცირებენ ხარჯვას, რის გამოც მცირდება საერთო მოთხოვნა, ეს კი ფასების ზრდას უშლის ხელს;
  • რეფინანსირების განაკვეთი გავლენას ინფლაციაზეც ახდენს და მისი ზრდისას დაკრედიტების მოცულობა მცირდება, შემცირებული დაკრედიტება კი ინფლაციის ტემპს ანელებს.

დეტალები: ბოლო რამდენიმე თვის განმავლობაში რეფინანსირების განაკვეთი 11% იყო — მონეტარული პოლიტიკის კომიტეტმა კი 0.5 პროცენტული პუნქტით შემცირების გადაწყვეტილება მიიღო.

  • როგორც ეროვნულ ბანკში განმარტავენ, ინფლაციური ტენდენციებისა და პროგნოზის გათვალისწინებით, გამკაცრებული მონეტარული პოლიტიკიდან ეტაპობრივი გამოსვლა დაიწყეს.
  • თუმცა, აქვე აღნიშნავენ, რომ, პოზიტიური ტენდენციების მიუხედავად, გაურკვევლობა კვლავ მაღალია.
  • მათივე თქმით, ერთ-ერთ მთავარ რისკად რჩება გეოპოლიტიკური მდგომარეობაც. აქედან გამომდინარე, მაღალი გაურკვევლობის პირობებში, მოსალოდნელია, რომ საქართველოს ეროვნული ბანკი მონეტარული პოლიტიკის განაკვეთის შემცირებას მხოლოდ ნელი ტემპით განაგრძობს.
  • საზოგადოება და ბანკების ინფორმაციით, 2023 წლის 23 მარტის მდგომარეობით, რეფინანსირების განაკვეთზე 180 300 სესხი იყო გაცემული — სწორედ ამდენ ადამიანს გაუიაფდება სესხი პროცენტი 0,5%-ით.

რეფინანსირების განაკვეთზე მიბმულ სესხს კომერციული ბანკი თავის სარგებელსაც ამატებს.

  • თუ ბანკის სარგებელი პირობითად 5%-ა, მაშინ მსესხებლისთვის სესხი 16%-იანი (11+5) იქნება;
  • განაკვეთის 9%-მდე შემცირების შემთხვევაში სესხის მომსახურების ხარჯი 14%-მდე შემცირდება;
  • 12%-მდე ზრდის შემთხვევაში კი პირიქით 17%-მდე გაიზრდება.