მეთოდოლოგია: CRRC-ის ინფორმაციით, მოსახლეობის გამოკითხვა Zinc Network-ის დაკვეთით 2023 წლის 11 იანვრიდან 8 თებერვლის ჩათვლით პერიოდში ქართულ, სომხურ და აზერბაიჯანულ ენებზე ჩატარდა.

  • ჯამში პირისპირ გამოიკითხა 2 757 რესპონდენტი. გამოკითხვის შედეგები წარმომადგენლობითია მთელი საქართველოსი, ოკუპირებული ტერიტორიების გარდა.
  • მათივე ცნობით, ცდომილების ზღვარი +-2.4%-ია.
  • გარდა ამისა, 10-14 მარტს ჩატარდა დამატებით 1 048 სატელეფონო ინტერვიუ. ამ შემთხვევაში ცდომილების ზღვარი +-2,6%-ს შეადგენს.
  • კვლევა საზოგადოების მიერ საინფორმაციო წყაროების მოხმარებას, პროპაგანდისტული გზავნილებისადმი დამოკიდებულებას, საქართველოს ევროკავშირსა და NATO-ში ინტეგრაციას, რუსეთის უკრაინაში შეჭრას და ქვეყნის დემოკრატიულ განვითარებასთან დაკავშირებულ საკითხებს შეეხება.

რატომ არის მნიშვნელოვანი: ევროკავშირმა საქართველოს მოლდოვისა და უკრაინისგან განსხვავებით, კანდიდატი ქვეყნის სტატუსი არ მიანიჭა — მისცა პერსპექტივა და 12 პუნქტიანი გეგმა.

  • ევროკომისიამ ასოცირებული ტრიოს სამივე ქვეყნისთვის გასცა დეოლიგარქიზაციის რეკომენდაცია და მოუწოდა, აღმოფხვრან ოლიგარქების გადაჭარბებული გავლენა ეკონომიკურ, პოლიტიკურ და საზოგადოებრივ ცხოვრებაზე.
  • მოლდოვისა და საქართველოს რეკომენდაციები ამ მიმართულებით იდენტურია, ხოლო უკრაინას დაევალა, უკვე მიღებული კანონის შესაბამისად, სამართლებრივად გამართულად იმუშაოს ამ საკითხზე.
  • ქართული ოცნება ივანიშვილის ოლიგარქობას არ აღიარებს.

დეტალები: კითხვაზე, თქვენი აზრით, რომელ პიროვნებას ან პიროვნებებს მოიაზრებს ევროკომისია ოლიგარქში ან ოლიგარქებში, პასუხები ასე გადანაწილდა:

  • გამოკითხულთა 45% ფიქრობს, რომ ოლიგარქებში ბიძინა ივანიშვილი იგულისხმება.
  • დავით კეზერაშვილს ასახელებს 9%, მიხეილ სააკაშვილს — 8%, მამუკა ხაზარაძეს —7%, ვანო ჩხარტიშვილს — 5%.

ფოტო: CRRC