რატომ არის მნიშვნელოვანი: აქონდროპლაზიის დიაგნოზის მქონე ბავშვების მშობლების თქმით, ზურაბ აზარაშვილმა პირად საუბარში მათ განუცხადა, რომ პრეპარატისთვის საჭირო ფული "არ ულაგია".

  • დედები ითხოვენ, გასაჯაროვდეს ჯანდაცვის სამინისტროში გამართული შეხვედრის ჩანაწერი, რომელიც მათ ნათქვამს დაადასტურებს.
  • ამ საკითხში დასახმარებლად მშობლებმა ომბუდსმენსაც მიმართეს, რომელიც კანცელარიასთან იმყოფებოდა.

დეტალები: აზარაშვილის თქმით, მათი მხრიდან არასდროს არ გაჟღერებულა, რომ ბიუჯეტთან დაკავშირებით პრობლემა იყო.

  • "არასდროს არ გაკეთებულა აქცენტი იმაზე, რომ ბიუჯეტში არის წელს [თანხა], ან არ არის წელს, იყო წინა წელს თუ მომდევნო წელს იქნება. აქედან გამომდინარე, ის საკითხი, რომ ბიუჯეტთან მიმართებაში არის პრობლემა, არასდროს არ დაფიქსირებულა. ამას ვადასტურებ", — თქვა აზარაშვილმა მთავრობის სხდომის დასრულების შემდეგ.

აქონდროპლაზია იშვიათი გენეტიკური დაავადებაა, რომელიც ზრდის თანდაყოლილ დარღვევას იწვევს.

  • მშობლები წელიწადზე მეტია, უშედეგოდ ითხოვენ ამ დიაგნოზის სამკურნალო ერთადერთი პრეპარატის, ვოსორიტიდის, შემოტანას, რომლის წლიური დოზაც, დაახლოებით, 200 000 დოლარი ჯდება.
  • ვოსორიტიდს აშშ-ის წამლისა და საკვების ადმინისტრაციისა (FDA) და ევროპის წამლის სააგენტოს (EMA) ავტორიზაცია 2021 წელს მიენიჭა, თუმცა მთავრობა ირწმუნება, რომ პრეპარატის უსაფრთხოებაში დასარწმუნებლად მეტი მტკიცებულება სჭირდებათ.
  • ჯანდაცვის მინისტრთან მშობლების შეხვედრები უშედეგო აღმოჩნდა, პრემიერმინისტრი კი პროტესტის მონაწილეებთან საუბარზე უარს ამბობს.
  • გუშინ ჯანდაცვის მინისტრის მოადგილემ, თამარ გაბუნიამ თქვა, რომ პროცესი კონსტრუქციული დიალოგის ფორმატში უნდა გაგრძელდეს.