რატომ არის მნიშვნელოვანი: საერთაშორისო რესპუბლიკური ინსტიტუტის ახალი საზოგადოებრივი აზრის კვლევა (Center for Insights in Survey Research) კიდევ ერთხელ აჩვენებს, რომ საქართველოს ევროკავშირში გაწევრიანებას მტკიცე მხარდაჭერა აქვს.

  • გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას — მხარდაჭერა, წინა კვლევასთან შედარებით, 4%-ით არის გაზრდილი და ისტორიულ მაქსიმუმს აღწევს.
  • ამავდროულად, საქართველოს მოქალაქეები არ უჭერენ მხარს ქვეყანაში რუსეთის მოქალაქეების ყოფნას — გამოკითხულთა 79% წინააღმდეგია, მათ ბიზნესის რეგისტრაციის, ქონების შეძენის ან საქართველოში უვიზოდ შემოსვლის უფლება ჰქონდეთ.
  • გარდა ამისა, კვლევის მიხედვით, პოლიტიკური პარტიების მიმართ ნდობის მაჩვენებელი დაბალია — გამოკითხულთა 42% აცხადებს რომ არცერთი პოლიტიკური პარტია არ გამოხატავს მათ ინტერესებს, ხოლო, საზოგადოების 78% -ს პოლიტიკაში მეტი ახალგაზრდის ხილვა სურს.

დეტალები: გამოკითხულთა 39% ფიქრობს, რომ მედიის დამოუკიდებლობა არც გაუმჯობესებულა და არც გაუარესებულა, ანალოგიური მაჩვენებელი გამოხატვის თავისუფლების შემთხვევაში 37%-ია.

  • კვლევის თანახმად, გამოკითხულთა 27% ფიქრობს, რომ მედიის დამოუკიდებლობა გასულ წელთან შედარებით გაიზარდა.
  • 32% დადებით ტენდენციას ხედავს გამოხატვის თავისუფლების თვალსაზრისით.

კონტექსტი: მიმდინარე წელს ანტიდასავლური, პრორუსული და ქართული ოცნებისგან ფორმალურად გამიჯნული ხალხის ძალა, მმართველ გუნდთან შეთანხმებით, აპირებდა მიეღო რუსული კანონი, რომელსაც უცხოური გავლენის აგენტებად უნდა გამოეცხადებინა დამოუკიდებელი მედია და არასამთავრობო სექტორი.

  • ინიციატორებს კანონის გაწვევა მზარდი საზოგადოებრივი პროტესტის შემდეგ მოუწიათ — 7-8 მარტის აქციები სამართალდამცველებმა არაერთხელ დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით, მოგვიანებით კი დაარბიეს.
  • აქციებზე დაშავდა მედიის არაერთი წარმომადგენელი — მათ სამართალდამცველები ფიზიკურად უსწორდებოდნენ, მიუხედავად იმისა, რომ იცოდნენ, ისინი ასრულებდნენ პროფესიულ მოვალეობას.
  • ასევე, წელს პარლამენტმა შემოიღო მედიის შემზღუდავი კანონი, რომლის საფუძველზეც, საკანონმდებლო ორგანოში მუშაობის აკრედიტაცია შეუჩერდა დამოუკიდებელი მედიის ჟურნალისტებს.

მეთოდოლოგია: IRI-ის ინფორმაციით, კვლევა ჩატარდა 2023 წლის 4-23 მარტის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ.

  • საველე სამუშაოები ჩატარდა IPM-ის მიერ, მონაცემები შეგროვდა პირისპირ ინტერვიუს გზით.
  • შერჩევა მოიცავდა საარჩევნო ხმის უფლებისა და ასაკის მქონე 1 500 რესპონდენტს.
  • მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად.
  • ცდომილების ზღვარი წარმოადგენს +/- 2.5 %, გამოპასუხების მაჩვენებელი — 63%.
  • კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.