საქართველოს საპარლამენტო უმცირესობის წევრი ევროპული საქართველოდან, სერგო რატიანი მიიჩნევს, რომ ხელისუფლებას ჰქონდა შესაძლებლობა საზოგადოებრივი მაუწყებელი გამხდარიყო კრიტიკული ტელევიზია. დეპუტატის თქმით, ამ მაუწყებლის ნდობა საზოგადოებაში იმიტომ იყო მაღალი რომ ხელისუფლებას არ ექვემდებარებოდა და აკრიტიკებდა. ამის შესახებ რატიანმა საქართველოს პარლამენტის პლენარულ სხდომაზე სიტყვით გამოსვლისას განაცხადა.

რატიანი ამბობს, რომ საზოგადოებრივი მაუწყებელი 20/30-ის პროექტია, რაც ხელისუფლების შესანარჩუნებლადაა საჭირო. დეპუტატი სიტყვის გამოსვლის დროს საზოგადოებრივი მაუწყებლის დახურულ გადაცემებს სალომე ასათიანის ინტერVIEW-სა და გოგი გვახარიას წითელი ზონასაც შეეხო.

"საბჭოთა ტელევიზია იმისაა, ვინმე კი არ წარმოაჩინოს, არამედ ვინმე დამალოს. ხშირ შემთხვევაში თქვენი [საზოგადოებრივი მაუწყებლის] პროექტი არის არა ისეთი, რომ დებატები იყოს და პოლიტიკური ტოქ-შოუები გაიზარდოს, იქ წარმოჩინდეს, როგორი სახე აქვს უმრავლესობას და ოპოზიციას არამედ უნდა გააქროს. მართლები არიან, მათი [სალომე ასათიანი, გოგი გვახარია] ჩვენების პრობლემა გაქვთ," - თქვა რატიანმა.

დეპუტატს მიაჩნია, რომ ამ გადაცემების არსებობა მნიშვნელოვანი, რისთვისაც მაუწყებელს მცირე ხარჯი ჰქონდა, მსგავსი გადაცემის საკუთარი რესურსით დამზადება კი დანახარჯებს გაზრდის.

"ჰქონია ამხელა რეიტინგი რომელიმე გადაცემას, როგორიც ჰქონდა სალომე ასათიანს როდესაც ეკითხებოდა და ცუდ მდგომარეობაში ჩააყენა თქვენი ბიძინა ივანიშვილი? ბიძინა ივანიშვილს თავის გადაცემაში არ ჰქონია მაგის რეიტინგი. ვანოს შოუში გაცილებით მაღალი რეიტინგი აქვს. იმიტომ, კი არა, რომ მან რაღაცის გაკეთება არ იცის, არამედ ძალაუფლება და მედია ერთად ვერ თავსდება. შეიძლება ძალიან მაგარი ბიზნესპროექტები აკეთო, მაგრამ როგორც კი ძალაუფლებას მოკიდებ ხელს, ადამიანები უბრალოდ აღარ გენდობიან," - ასე მიმართა დეპუტატმა საზოგადოებრივი მაუწყებლის სამეურვეო საბჭოს თავმჯდომარეს, გრიგოლ გოგელიას, რომელიც მის გამოსვლას ისმენდა.

რატიანი საზოგადოებრივ მაუწყებელზე GDS-ის ყოფილი თანამშრომლობის დასაქმების საკითხსაც შეეხო. მის თქმით, იმ დროს როცა არხის დირექტორი მაუწყებლის ფინანსურ კრიზისზე საუბრობდა GDS-ს თანამშრომლებს ასაქმებდა.

13 ივნისს ცნობილი გახდა, რომ საზოგადოებრივ მაუწყებელზე სალომე ასათიანის ინტერVIEW და გოგი გვახარიას წითელი ზონა ივლისის შუა რიცხვებიდან აღარ გავა. მაუწყებლის სტრატეგიული სამსახურის უფროსი, ია ანთაძე ამბობს, რომ მომავალი სეზონიდან მაუწყებლის ეთერში მხოლოდ კონკურსის წესით შერჩეული ან საკუთარი რესურსით დამზადებული გადაცემები მოხვდება. საზოგადოებრივი მაუწყებლის მიმდინარე და ახალი ამბების ბლოკის დირექტორმა, გიორგი გვიმრაძემ კი On.ge-ს უთხრა, რომ რადიო თავისუფლებამ მაუწყებლისგან ხელშეკრულებების ვადის ამოწურვის შესახებ მიიღო წერილი, თუმცა გაგრძელდება თუ არა გადაცემები, გვიმრაძეს კონკრეტული პასუხი არ აქვს.