"როცა ქვეყანას ადამიანის უფლებების დაცვის კუთხით ლიდერობაზე აქვს პრეტენზია რეგიონში, ძალიან მარტივია ეს ლიდერობა დაიკარგოს, თუ მსგავსი მოქმედებები განმეორდება", - ფონდ ღია საზოგადოება საქართველოს ევროინტეგრაციის პროგრამის მენეჯერმა, ვანო ჩხიკვაძემ On.ge-სთან ინტერვიუში ისაუბრა, აფგან მუხტარლის საქმეზე, ევროპარლამენტის რეზოლუციის ძირითად მესიჯებზე და საფრთხეებზე.

ევროპარლამენტმა, აზერბაიჯანელი ჟურნალისტის, აფგან მუხტარლის საქმეზე და აზერბაიჯანში მედიის მდგომარეობაზე გუშინ, 16 ივნისს რეზოლუცია მიიღო. დღეს კი ევროკომისარი იოჰანეს ჰანი ბაქოს ეწვია. რეზოლუციის მიღებას თან ახლდა დისკუსია, სადაც საუბარი შეეხო საქართველოს, როგორც დამოუკიდებელ სახელმწიფოს რეპუტაციის შელახვას. ვანო ჩხიკვაძის შეფასებით, ეს [რეზოლუცია] არის სიგნალი, რომ საქართველო იყოს კონცენტრირებული, როდესაც საქმე ეხება ადამიანის უფლებების დაცვას:

"შესაძლოა, სერიოზული ეჭვის ქვეშ დადგეს ის მიღწევები, რაც ბოლო რამდენიმე წლის განმავლობაში გვაქვს. მათ შორის, იგივე პრესის თავისუფლების, ადამიანის თავისუფალი გადაადგილების თვალსაზრისით და ა.შ. ანუ, წარმომიდგენია, რომ ეს უფრო იმიჯის თვალსაზრისით იქნება".

კითხვაზე, შეიძლება თუ არა საქართველოსა და ევროკავშირს შორის ასოცირების ხელშეკრულების დარღვევად მიიჩნიონ ეს საქმე, ჩხიკვაძე პასუხობს, რომ აღნიშნულ დოკუმენტს საფრთხე არ ემუქრება:

"მათი [ევროპელი ლიდერების] განცხადებები არ იქნება ჰაერში გასროლილი სიტყვები და ამას ეფუძნება მოქმედებებიც, მაგალითად, ფინანსური დახმარების კუთხით, თუ სამომავლოდ რაიმე მოხდება, შეიძლება ამას ჩრდილი მიადგეს. თუმცა, კონკრეტულად, რომ ამას მოჰყვება ეს, ასეთი რამ არ არსებობს".

ვანო ჩხიკვაძის თქმით, იოჰანეს ჰანის დღევანდელი ვიზიტი აზერბაიჯანში, დაკავშირებულია ადამიანის უფლებების დაცვასთან აზერბაიჯანში და იგი იქნება უფრო მკვეთრი, ვიდრე აქამდე ყოფილა.

ჩხიკვაძე ასევე ვარაუდობს, რომ ვინაიდან ჰანის ვიზიტი დროში ემთხვევა ევროპარლამენტის რეზოლუციას, მას იგივე მესიჯის განმეორება მოუწევს, რაც დოკუმენტშია აღნიშნული.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.