ამერიკის შეერთებული შტატების სახელმწიფო დეპარტამენტი 2022 წელს საქართველოში ადამიანის უფლებების მდგომარეობის შესახებ ანგარიშს აქვეყნებს, სადაც მთავარი არხის გენერალურ დირექტორზე, ნიკა გვარამიაზე და ფორმულას დამფუძნებელზე, დავით კეზერაშვილზეცაა საუბარი.

რატომ არის მნიშვნელოვანი: ანგარიშში ვკითხულობთ, რომ წლის განმავლობაში ჟურნალისტებმა, არასამთავრობოებმა და საერთაშოროსო საზოგადოებამ შეშფოთება გამოთქვეს ხელისუფლების მხრიდან გამოხატვის თავისუფლების პატივისცემასთან დაკავშირებით.

• ნათქვამია, რომ სახალხო დამცველი აპარატმა და ადგილობრივმა სამოქალაქო საზოგადოებამ, ასევე, საერთაშორისო უფლებადამცველმა ორგანიზაციებმა მკაცრად გააკრიტიკეს საქალაქოს 16 მაისის გადაწყვეტილება გვარამიას თავისუფლების აღკვეთაზე.
• ასევე, ვკითხულობთ, რომ სახალხო დამცველის აპარატმა ეს საქმე პოლიტიკურ დევნად შეაფასა.
• Amnesty International-ზე დაყრდნობით, აღნიშნულია, რომ გვარამიას პატიმრობამ გამოავლინა "მთავრობის მზარდი გავლენა სასამართლოებზე რიგ საქმეებში, რომლებიც მიზნად ისახავს მათი კრიტიკოსებისა და ოპონენტების დათრგუნვას".

გარდა ამისა, ანგარიშში ხაზგასმულია ისიც, რომ 2 ნოემბერს თბილისის სააპელაციო სასამართლომ ძალაში დატოვა ორივე ინსტანციის გადაწყვეტილება, რომელსაც ომბუდსმენის აპარატმა და არასამთავრობოებმა დაუსაბუთებელი უწოდეს.

• ამასთან, სახალხო დამცველზე დაყრდნობით წერენ იმასაც, რომ გვარამიას საქმეზე სამართლიანი სასამართლოს უფლების სხვადასხვა კომპონენტის დარღვევა გამოვლინდა.
• საუბარია იმაზეც, რომ რუსთავი 2-ის კომერციულ დირექტორთან მეგობრობის გათვალისწინებით, საქმის განხილვისას არასამთავრობო ორგანიზაციებმა ინტერესთა კონფლიქტი დაადგინეს და მოსამართლე ლაშა ჩხიკვაძის აცილების საკითხი დააყენეს.
• სახელმწიფო დეპარტამენტი ხაზს უსვამს იმასაც, რომ არასამთავრობოებმა, ოპოზიციურმა პარტიებმა, საერთაშორისო ორგანიზაციებმა, მათ შორის, Amnesty International-მა საქმეს პოლიტიკურად მოტივირებული უწოდეს.

კეზერაშვილი: აშშ-ის სახელმწიფო დეპარტამენტი ფორმულას დამფუძნებლის, დავით კეზერაშვილის საქმეზეც საუბრობს.

• "მედიის დამკვირვებლებმა გამოთქვეს შეშფოთება იმის გამო, რომ თავდაცვის სამინისტროს სარჩელი ფორმულას მთავარი მფლობელისა და თავდაცვის ყოფილი მინისტრის დავით კეზერაშვილის წინააღმდეგ მიმმართული იყო ხელისუფლებისთვის კრიტიკული მედიის ჩახშობისკენ".
• როგორც ანგარიშში ვკითხულობთ, კეზერაშვილი შიშობდა, რომ სახელმწიფო გაყინავდა მის ერთადერთ ქონებას საქართველოში. 29 მარტს კი საქალაქომ გაფლანგვის საქმეზე 5 მილიონზე მეტი დააკისრა.
• ანგარიშში მოხვდა კეზერაშვილის საქმეზე დემოკრატიული ინიციატივის დირექტორის, ედუარდ მარიკაშვილის 17 ნოემბრის განცხადება, სადაც ის ამბობს, რომ ფორმულას დამფუძნებელი საქართველოში სხვა აქტივებს არ ფლობს.
• "დიდი ალბათობაა, რომ ლეგალურად მისი აქტივების გაყინვა მოხდეს ფორმულას ანგარიშების გაყინვით".
• "2021 წლის სექტემბერში, უზენაესმა სასამართლომ კეზერაშვილი გაასამართლა და დაუსწრებლად მიუსაჯა 10 წლით თავისუფლების აღკვეთა, რომელიც 2012 წლის ამნისტიის კანონის საფუძველზე განახევრდა. კეზერაშვილმა სისხლის სამართლის საქმესთან დაკავშირებით სარჩელი ადამიანის უფლებათა ევროპულ სასამართლოში შეიტანა", — ნათქვამია დოკუმენტში.