გასულ წელს NASA-მ მთვარის სამხრეთ პოლუსის მიმდებარედ არსებული 13 რეგიონი დაასახელა, რომელთაგანაც ერთ-ერთზე ასტრონავტები 2025 წელს ჩანიშნული მისიის ფარგლებში დადგამენ ფეხს. მათ შორისაა მალაპერტის მასივი, რომელიც დაახლოებით 4 მილიარდი წლის წინ წარმოიქმნა და დედამიწის ბუნებრივ თანამგზავრზე ერთ-ერთი ყველაზე დიდი კრატერია.

NASA-ს მთვარის ზონდმა Reconnaissance ამ არეალის ამსახველი ახალი სურათი გადაიღო. შთამბეჭდავი კადრი მან 3 მარტს დააფიქსირა, როცა შეკლტონის კრატერისგან 170 კილომეტრამდე მანძილი აშორებდა. უკანასკნელ ფოტოზე მისია Artemis 3-ის დაშვების პოტენციური ადგილი ნაწილობრივ მოჩანს.

ფოტო: NASA/GSFC/Arizona State University

ესაა მოსწორებული ზედაპირის მქონე არეალი წარწერა "5000"-ის მაღლა. მწვერვალიდან ხედი გასაოცარი იქნება, რადგან ის 5 000 მეტრზე მეტ სიმაღლეზეა. აღნიშნული რეგიონი დაშვების ერთ-ერთ მთავარ კანდიდატად განიხილება, სადაც "რობოტების ქარავანი" იმოძრავებს და იქაურ მიდამოს გამოიკვლევს. ასევე, ის კომუნიკაციისა და სინათლის ხელმისაწვდომობის მხრივაც ხელსაყრელია.

აღსანიშნავია, რომ მთვარის ეს 13-ივე რეგიონი გეოლოგიურად უძველესია, მუდმივად ჩრდილიანი ადგილებით, და დედამიწის თანამგზავრის ისტორიის შესწავლის საშუალებას იძლევა.

რაც შეეხება Artemis 3-ს, ეს იქნება1972 წლის შემდეგ მთვარეზე განხორციელებული პირველი ეკიპაჟიანი მისია, რომლის განმავლობაშიც ადამიანები ჩვენს მეზობელ ციურ სხეულზე ფეხს კიდევ ერთხელ დადგამენ. მისიის ფარგლებში იქ პირველი ქალი და პირველი ფერადკანიანი დაეშვება.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.