არასამთავრობო ორგანიზაციები ერთობლივ განცხადებას ავრცელებენ.

რატომ არის მნიშვნელოვანი: გუშინ საგარეო და თავდაცვის კომიტეტებმა რუსულ კანონს მხარი დაუჭირეს, რასაც, პარალელურად, პარლამენტსა და მიმდებარე ტერიტორიაზე ჟურნალისტები და არასამთავრობო სექტორის წარმომადგენლები ვაპროტესტებდით.

• კომიტეტების სხდომაზე არ შეგვიშვეს მედია, NGO-ები, კრიტიკულად განწყობილი დეპუტატები, თუმცა შეუშვეს ანტიდასავლური მოძრაობის, ხალხის ძალის წევრები და ქართულ ოცნებასთან აფილირებული ე.წ. უფლებადამცველები.
• პოლიციამ დააპატიმრა აქციაზე მისული 36 ადამიანი, მედიის წარმომადგენლები და აქტივისტები — უმეტესად იმიტომ, რომ კონსტიტუციით მინიჭებული გამოხატვის თავისუფლებით სარგებლობდნენ და მონასა და მოღალატეებს იძახდნენ.
• ხოლო მედიაზე, რომელიც პარლამენტში მიმდინარე პროცესებს აშუქებდა, იძალადეს — საკანონმდებლო ორგანოს ეზოდან ძალის გამოყენებით გამოაგდეს On.ge-ის მთავარი რედაქტორი, ნეტგაზეთის ჟურნალისტი და ფორმულას ფოტოგრაფი.
• აქციაზე დააკავეს ტაბულას ჟურნალისტი, ბექა ჯიქურაშვილი და პუბლიკას დირექტორი, ზურა ვარდიაშვილი.
• მუშაობისას დაშავდა TV პირველის ოპერატორი, რომელმაც შეტაკებების დროს მიიღო დაზიანებები და აღენიშნება ფეხისა და თავის ტრავმა.

დეტალები: განცხადებაში ნათქვამია, რომ დაკავებულთა ნაწილი მთელი ღამის განმავლობაში საპატრულო პოლიციის მანქანებში ჰყავდათ და იზოლატორებში მათი შეყვანა მხოლოდ დილიდან დაიწყო.

• "წუხელ განვითარებული მოვლენები კიდევ ერთხელ ადასტურებს, რომ ადმინისტრაციულ სამართალდარღვევათა არსებული კანონმდებლობა პოლიციის ხელში რეპრესიული ინსტრუმენტია, რომელიც უფლებების გაუმართლებელი შეზღუდვისათვის გამოიყენება", — აცხადებენ NGO-ები.
• მათივე ინფორმაციით, გართულებულია ადვოკატებისა და ოჯახის წევრებისათვის დაკავებულთა ზუსტი ადგილსამყოფლის დადგენა, რაც აფერხებს მათი უფლებების დაცვის შესაძლებლობას.
• დაკავებულები, ასევე, საუბრობენ ფიზიკურ დაზიანებებზე, რომლებიც დაკავებისას მიიღეს.

• "შსს-ს ამ დრომდე არ გაუკეთებია ოფიციალური განცხადება, რა გახდა დაკავებულთა გარკვეული ნაწილის ამ დრომდე იზოლატორებში დაყოვნების საფუძველი და რატომ არ გათავისუფლდნენ ისინი სხვა პირების მსგავსად ღამით, ხელწერილის საფუძველზე. მკაფიოდ გვინდა, განვაცხადოთ, რომ ადმინისტრაციული წესით დაკავების და დაკავების შემდგომი პრაქტიკა არის მიუღებელი და არღვევს ადამიანის ფუნდამენტურ უფლებებს", — ვკითხულობთ განცხადებაში.

განცხადებას ხელს აწერენ:

• საქართველოს ახალგაზრდა იურისტთა ასოციაცია (საია)
• საერთაშორისო გამჭვირვალობა - საქართველო
• უფლებები საქართველო
• წამების მსხვერპლთა ფსიქოსოციალური და სამედიცინო რეაბილიტაციის ცენტრი - GCRT
• საქართველოს დემოკრატიული ინიციატივა
• სამართლიანი არჩევნებისა და დემოკრატიის საერთაშორისო საზოგადოება (ISFED)
• ქალთა ინიციატივების მხარდამჭერი ჯგუფი WISG
• ქალთა ფონდი საქართველოში
• საბჭოთა წარსულის კვლევის ლაბორატორია
• სოციალური სამართლიანობის ცენტრი
• ღია საზოგადოების ფონდი
• მწვანე ალტერნატივა
• საქართველოს სასამართლოს გუშაგი
• ადამიანის უფლებათა ცენტრი
• საქართველოს რეფორმების ასოციაცია (GRASS)