შინაგან საქმეთა სამინისტროს ინფორმაციით, აგლაძის ქუჩაზე მომხდარი ჯგუფური ძალადობის ფაქტზე ორი პირი დააკავეს, ხოლო ერთი პირის ადგილსამყოფლის დასადგენად და დასაკავებლად შესაბამისი ღონისძიებები ტარდება. გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილით მიმდინარეობს.

"შინაგან საქმეთა სამინისტროს თბილისის პოლიციის დეპარტამენტის დიდუბე-ჩუღურეთის მთავარი სამმართველოს თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, 2002 წელს დაბადებული ლ.ე. და ამავე წელს დაბადებული ლ.ა., ჯგუფური ძალადობის ბრალდებით დააკავეს.

გამოძიებით დადგინდა რომ, მიმდინარე წლის 2 აპრილს თბილისში, ღამის საათებში რაფაელ აგლაძის ქუჩის მიმდებარედ, ლ.ა.-ს, ლ.ე.-ს, 2001 წელს დაბადებულ ნ.ც.-სა და 1993 წელს დაბადებულ ო.მ.-ს შორის მოხდა კონფლიქტი და სიტყვიერი შელაპარაკება გადაიზარდა ფიზიკურ დაპირისპირებაში.

სამართალდამცველებმა, საქმეზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, ბრალდებულები დააკავეს, ხოლო ნ.ც.-ს ადგილსამყოფლის დადგენისა და დაკავების მიზნით ტარდება შესაბამისი ღონისძიებები", — ნათქვამია განცხადებაში.

შეგახსენებთ, სროლა 2 აპრილის გვიან ღამით, დიდუბეში, აგლაძის ქუჩაზე ფიზიკური დაპირისპირებას იარაღის გასროლაც მოყვა. სოციალურ ქსელში გავრცელებული კადრების მიხედვით, ადგილზე 10-ზე მეტი ახალგაზრდა იმყოფებოდა.

თვითმხილველმა ტვ პირველთან საუბრისას განაცხადა, რომ დაინახეს, როგორ ეგდო ერთი ბიჭი ძირს, რომელსაც რამდენიმე ადამიანი გამეტებით ურტყამდა. მათ ასევე 5-ჯერ გასროლის ხმაც გაიგეს.

"რამდენიმე წუთის განმავლობაში გრძელდებოდა ყვირილი, გინება, ჩხუბი. მერე ერთმა პირმა ჰაერში გაისროლა, ალბათ, 5-ჯერ, მაგრამ როცა პოლიცია მოვიდა, ის უკვე გაქცეული იყო და როგორც ვიცი, ვერ დაიჭირეს. სიბნელე იყო, ბევრი ადამიანი ირეოდა ერთმანეთში, მაგრამ ჩანდა, რომ ერთმანეთს უმოწყალოდ ურტყამდნენ," — აღნიშნავს თვითმხილველი.