შალვა პაპუაშვილმა აჭარის ტელევიზიასთან ისაუბრა, რომ ჯერ არ გასცნობია ბოლომდე ხალხის ძალია პროექტს.

რატომ არის მნიშვნელოვანი: ანტიდასავლურმა მოძრაობამ, ხალხის ძალამ "უცხოური გავლენის აგენტებზე" კანონპროექტი დააინიცირა.

• კანონით, "უცხოური გავლენის გამჭვირვალობის უზრუნველყოფის მიზნით", შეიქმნება "უცხოური გავლენის აგენტების" რეესტრი, სადაც დარეგისტრირდება ყველა ის არასამეწარმეო იურიდიული პირი და მედიასაშუალება, რომელთა შემოსავლების 20 პროცენტზე მეტი ფინანსდება უცხოური ძალების მიერ.
• მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი თავისუფალი სიტყვის წინააღმდეგ გამოიყენა.

დეტალები: პაპუაშვილის განცხადებით, ეს ერთის მხრივ, ფაქიზი საკითხია, თუმცა მეორეს მხრივ არ არის ახალი.

• "მე პირადად როგორც არასამთავრობო ორგანიზაციებთან, ისე დონორებთან ყოველთვის მაქვს ხოლმე ამაზე საუბარი, რომ მნიშვნელოვანი არის გამჭვირვალეობის უზრუნველყოფა იმ სფეროში, სადაც ხდება პოლიტიკური გადაწყვეტილების ფორმირება და მიღება".
• "პოლიტიკური გადაწყვეტილების ფორმირებისა და მისი მიღების პროცესში გამჭვირვალობა გულისხმობს, რომ საზოგადოებას აქვს უფლება იცოდეს, რომ ხალხი ვინც იღებს გადაწყვეტილებას, რომელსაც აქვს შემდეგ ზეგავლენა მათ ცხოვრებაზე, ის ხალხი რა ინტერესებით მოქმედებს", — ასე აფასებს პაპუაშვილი.
• მისი თქმით, პოლიტიკურ პარტიებს აქვთ ვალდებულება საჯარო იყოს მათი შემომწირველებისა და ხარჯების შესახებ.
• "როცა გადაწყვეტილების მიღების პროცესში, გარდა პოლიტიკური ჯგუფებისა, ერთვებიან სხვა პირებიც, ორგანიზაცია იქნება თუ ა.შ. რა თქმა უნდა, ისინი ექცევიან ავტომატურად მოქალაქეების მხრიდან... მოქალაქეებმა უნდა იცოდნენ რა ინტერესებია მათ უკან".

გარდა ამისა, პაპუაშვილმა ახსენა "აგენტებიც" და თქვა, რომ ხდება ტერმინების აღრევა.

• "ჯაშუშად ხდება აგენტობის გადმოთარგმნა", — თქვა მან.
• "ეს შეიძლება სენსიტიური თემა იყოს ზოგადად, მაგრამ გამჭვირვალობასთან დაკავშირებით ასეთი დამოკიდებულება, თანაც იმ ჯგუფისგან, რომელიც ითხოვს აბსოლუტურ გამჭვირვალობას სხვებისგან, როგორ შეიძლება უარზე იყოს, რომ გამჭვირვალობის მაღალი სტანდარტი იყოს მათ მიმართ".

შეფასებები: ექსპერტთა ნაწილი უარყოფითად აფასებს მსგავს კანონპროექტს.

• ქართული ოცნების ყოფილი წევრი თამარ ხულორდავა ამბობს, რომ არა თუ უცხოური გავლენის აგენტის შესახებ კანონის მიღება, არამედ მისი სერიოზული განხილვაც კი მნიშვნელოვნად დააზიანებს საქართველოს ისედაც შერყეულ საერთაშორისო რეპუტაციას.
• საერთაშორისო ურთიერთობების გერმანული საბჭოს (DGAP) საერთაშორისო წესრიგისა და მმართველობის ცენტრის ხელმძღვანელი აღმოსავლეთ ევროპაში, რუსეთსა და ცენტრალურ აზიაში აღნიშნავს, რომ საქართველოს მთავრობამ გადაუხვია ტრანსატლანტიკური და ევროპული ინტეგრაციის გზიდან.