პრეზიდენტი ზელენსკი შემაჯამებელ პრესკონფერენციას ბრიუსელში ევროსაბჭოს პრეზიდენტ, შარლ მიშელთან და ევროკომისიის პრეზიდენტ, ურსულა ფონ დერ ლაიენთან ერთად მართავს.

რატომ არის მნიშვნელოვანი: ეს ზელენსკის მეორე საგარეო ვიზიტია საზღვარგარეთ, მას შემდეგ რაც რუსეთმა უკრაინაში სრულმასშტაბიანი შეჭრა დაიწყო.

• უკრაინის პრეზიდენტი უკვე შეხვდა ბრიტანეთის პრემიერმინისტრს და მონარქს, გერმანიის კანცლერსა და საფრანგეთის პრეზიდენტს, ასევე, სიტყვით გამოვიდა ევროპარლამენტში.
• ზელენსკი მოუწოდებს პარტნიორებს გაზარდონ უკრაინის სამხედრო და ფინანსური მხარდაჭერა და გადასცენ მათ მოიერიშე თვითმფრინავები.
• უკრაინის პრეზიდენტმა საგარეო ვიზიტის ფარგლებში განხორციელებული შეხვედრები შეაფასა, როგორც ძალიან ძლიერი და მნიშვნელოვანი.

დეტალები: ჩარლზ მიშელი ამბობს, რომ ევროპამ უნდა გააგრძელოს უკრაინის მაქსიმალური მხარდაჭერა — მათ შორის სამხედრო ფრონტზე.

• ევროსაბჭოს პრეზიდენტი დასძენს, რომ მას სურს "თანმიმდევრული და მტკიცე" მიდგომა რუსეთთან დაკავშირებით, მათ შორის — აქტივების გაყინვასთან მიმართებით.
• ზელენსკის თქმით, შედგა დახურული შეხვედრა, რომლის მთავარი გზავნილიც იყო, რომ გრძელვადიანი მშვიდობა ევროპაში მხოლოდ უკრაინის გამარჯვების შემთხვევაშია შესაძლებელი.
• მისი ინფორმაციით, მიღწეული დადებითი შედეგები უკრაინის შემდგომი შეიარაღების საქმეში, თუმცა ამ ეტაპზე გადაწყვეტილებები საჯარო არ არის.
• მისი შეფასებით, რუსეთის შეჭრა უკრაინაში არის თავდასხმა არა მხოლოდ ევროპულ ღირებულებებზე, არამედ მათ სასიცოცხლო ინტერესებზე.
• ზელენსკიმ განაცხადა, რომ აქვს მოლოდინი, უკრაინა ევროკავშირის წევრი 2023 წელს გახდება.

ამასთანავე, ზელენსკიმ პრესკონფერენციაზე ენერგომომარაგების საკითხზე ისაუბრა.

• "უკრაინა ელექტროენერგიის ექსპორტს ახორციელებდა ევროკავშირში. ჩვენ ვქმნიდით თქვენს სოციალურ ცხოვრებას, თქვენს კეთილდღეობას, მაგრამ რუსეთმა დაიპყრო და ქსელიდან გამორთო ჩვენი ატომური ელექტროსადგური. ეს არის თქვენი ინტერესების დარღვევა".
• მისი შეფასებით, რუსეთის მცდელობა გაანადგუროს უკრაინის ეკონომიკა და ქალაქები მოქმედებს ყველაზე ევროპელზე.
• ზელენსკი ევროპულ ქვეყნებს მოუწოდებს დააწესონ სანქციები რუსული ინდუსტრიების მიმართ, რომლებიც თვითმფრინავებსა და რაკეტებს აწარმოებენ, ასევე IT სექტორის მიმართ, რომელიც რუს სამხედროებს მხარს უჭერს.
• "მაშინ, ჩვენ შეგვიძლია შევამციროთ ნგრევა და მოვაშოროთ [რუსეთს] თავდასხმების წყარო", — ამბობს ის.

ფონ დერ ლეიენი აცხადებს, რომ უკრაინის ევროკავშირში გაწევრიანების მცდელობა პროგრესირებს, და საჭიროა კავშირმა უკრაინის ოცნებები რეალობად აქციოს.

• ასევე, იგი მოუწოდებს საერთაშორისო საზოგადოებას, იზრუნოს სამართლიანობის აღდგენაზე, რაც მოიცავს ჩადენილ ომის დანაშაულებზე მტკიცებულებების მოიძიებას, პროკურორებთან ერთად მუშაობას და საერთაშორისო ტრიბუნალის შექმნას.
• "ხედავთ, ჩვენ ერთი ოჯახი ვართ, ერთი ხედვა გვაქვს და ოჯახის წევრები ერთმანეთს ეხმარებიან", — ამბობს ფონ დერ ლეიენი და დასძენს, რომ გააგრძელებს უკრაინის სრულ მხარდაჭერას.
• "უკრაინელები სიცოცხლეს სწირავენ თავისუფალ და დამოუკიდებელ უკრაინას. ჩვენ ვიცით, რომ ვერასდროს შევადარებთ იმ მსხვერპლს, რომელსაც უკრაინელები ყოველდღიურად იღებენ — მაგრამ ჩვენ შეგვიძლია თქვენი მხარდამჭერი ვიყოთ," — აცხადებს ევროკომისიის პრეზიდენტი.