ახალგაზრდული ვიდეო-ჟურნალის FlowFlow Magazine-ის ფეისბუქ გვერდზე გავრცელდა ინფორმაცია, რომ ჰიპ-ჰოპ პროექტის, Birja Mafia-ს წევრები, Young Mic და Kay-G დააკავეს. ისინი ვარაუდობენ, რომ დაჭერის მიზეზი გახდა ჯგუფის ახალი კლიპი Birja Mafia - Tsl Shavi Zeda, სადაც ერთ-ერთ კადრში პოლიციელს ძაღლის საყელური უკეთია.

დაკავების შესახებ ინფორმაციას ადასტურებს ჯგუფის ერთ-ერთი წევრის ცოლი, ერიკა კოპელენდი. იგი ამბობს, რომ მისი ქმარი, მიშკა მგალობლიშვილი ოთხშაბათს, 7 ივნისს გაუჩინარდა, მოგვიანებით, იმ დღესვე პოლიციამ მათი სახლი გაჩხრიკა. იგი ჰყვება, რომ დაკავების დროს, სამსახურში იმყოფებოდა და არ იცის, თუ როგორ მოხდა ეს. დიღმის პოლიციის განყოფილებაში მისვლისას კი ქმრის ნახვის უფლება არ მისცეს:

"ოთხშაბათს მიშკა აიყვანეს შეიძლება ქუჩაში, შეიძლება სახლში, ეს არ ვიცი, თუმცა ისინი ცდილობენ, რომ ნარკოტიკისთვის დაიჭირონ. ისინი ცდილობენ დაიჭირონ ის, ვის როლსაც კლიპში ასრულებს, მაგრამ ეს მხოლოდ პერსონაჟია, სინამდვილეში, მიშკა ასეთი არ არის. ისინი ცდილობენ მისგან შექმნან ის, ვინც სინამდვილეში არ არის. ოთხშაბათს მოვიდნენ პოლიციელები და სახლი გაჩხრიკეს. უნდოდათ ენახათ მართლა ნარკოტიკი ჰქონდა თუ არა მიშკას, მაგრამ მე ვუთხარი რომ მხოლოდ ალერგიის მედიკამენტს ატარებდა, რადგან საშინაელი ალერგია აწუხებს. შემდეგ ტესტიც ჩაუტარეს და ვერაფერი აღმოუჩინეს, თუმცა მაინც არ ათავისუფლებენ და არ ვიცი რატომ. ყველაფერი იმ ვიდეოს უკავშირდება, მიშკასთვის კი ეს მხოლოდ მუსიკაა".

შსს-დან ინფორმაციას მიღებისთანავე შემოგთავაზებთ.