პარიზის კლიმატის შეთანხმება, რომელიც აშშ-მ დონალდ ტრამპის გადაწყვეტილებით დატოვა, საქართველოსთვის ძალაში 7 ივნისიდან შევიდა. გარემოსა და ბუნებრივი რესურსების დაცვის სამინისტროს ცნობით, საქართველო იწყებს იმ ვალდებულების შესრულებას, 2015 წელს თვითონვე შეიმუშავა.

სამინისტროს წარმომადგენლის, გიზო ჭილიძის თქმით, პარიზის შეთანხმებას ჰქონდა სხვადასხვა ეტაპები. პირველი ეტაპი იყო როცა მსოფლიო საზოგადოებამ დაიწყო თანამშრომლობა და როცა დოკუმენტის პრინციპებზე მიმდინარეობდა მუშაობა.

ფოტო: საქართველოს გარემოსა და ბუნებრივი რესურსების დაცვის სამინისტრო

2015 წლის 12 დეკემბერს პარიზის შეთანხმებაზე ხელმოწერით 195-მა ქვეყანამ პირველად აიღო ვალდებულება, რომ ეკონომიკური განვითარების პარალელურად, შეამციროს კლიმატის ცვლილების გამომწვევი სათბურის გაზების გაფრქვევები და დაბალემისიიანი განვითარების გზით შეინარჩუნოს საშუალო წლიური გლობალური ტემპერატურის ზრდა 2 გრადუსის - ის ფარგლებში.

2015 წელს, საქართველომ მოამზადა "ეროვნულად განსაზღვრული წვლილის" დოკუმენტი, რომელშიც ასახულია ქვეყნის ხედვა სათბურის გაზების გაფრქვევების შემცირებისა და კლიმატის ცვლილებასთან ადაპტაციის მიმართულებით. კერძოდ, საქართველო გეგმავს, რომ ეკონომიკის სხვადასხვა სექტორიდან 2030 წლამდე ეტაპობრივად შეამციროს სათბურის გაზების გაფრქვევა 15-25%-ით:

"ჩვენი მიზანია, ხელი შევუწყოთ ენერგეტიკის, მრეწველობის, სოფლის მეურნეობისა და ნარჩენების მართვის სექტორებში თანამედროვე კლიმატ-გონივრული ტექნოლოგიების დანერგვას, მდინარეების კალაპოტებსა თუ შავი ზღვის სანაპირო ზოლში ნაპირდაცვითი ღონისძიებების განხორციელებას, მაღალმთიან რეგიონებში წყალმოვარდნებისა და ღვარცოფების რისკის შემცირებას, აღმოსავლეთ საქართველოს რეგიონებში გაუდაბნოების წინააღმდეგ ბრძოლას და მაღალი რისკის ქვეშ მყოფი მოსახლეობის დაცვას," - ამბობენ სამინისტროში.