საქართველოს დაზვერვის სამსახურის ყოფილი უფროსი, დავით სუჯაშვილი, ჩორჩანას ეპიზოდთან დაკავშირებით, საქართველოს პროკურატურაში გამოკითხვაზე მივიდა. გამოკითხვის შემდეგ მან ჟურნალისტებთან კომენტარი გააკეთა და აღნიშნა, რომ საგუშაგოს გახსნასთან დაკავშირებით ინფორმაცია არ ჰქონია.

"საგუშაგოს გახსნასთან დაკავშირებით ინფორმაცია არ გამაჩნდა, მედიის საშუალებით გავიგე. დაზვერვის სამსახური, ისევე როგორც სხვა სპეციფიკური სამსახურები, მუშაობენ თავიანთ ჩარჩოებში, დაზვერვის სამსახური სადაზვერვო ინფორმაციას მოიპოვებს საზღვრებს მიღმა, დაზვერვის სამსახური აქტიურად არის ჩართული არაღიარების მიმართულებით, ამიტომ ეს ინფორმაცია რომ არ მქონდა, პრობლემას ვერ ვხედავ. საგუშაგოს აღმართვასთან დაკავშირებით ინფორმაცია ღია წყაროებიდან გავიგე, კარგი იქნებოდა, რომ მანამდე მცოდნოდა", — განაცხადა მან.

დავით სუჯაშვილმა თქვა, რომ მისი ინფორმაციით საგუშაგოს გახსნამ მოსახლეობა რთულ სიტუაციაში ჩააყენა.

"რაც მე მაქვს ინფორმაცია, საგუშაგოს გახსნით მოსახლეობა რთულ სიტუაციაში ჩავარდა, რუსეთის ფედერაციამ დამატებითი საგუშაგოები გახსნა და სამეთვალყურეო საშუალებები დაამონტაჟა, ეს ჩემთვის ძალიან დიდი პრობლემაა.

აქ პოლიტიკას შეიმუშავებს და ახორციელებს სუს-ი, როგორ შეიძლება იყოს პასუხისმგებელი ერთი უწყება, თუ მეორე უწყება რაღაც საქმიანობას ახორციელებს, ისე რომ არ აყენებდეს საქმის კურსში მას, ვინც საქმის კურსში უნდა იყოს. ვალდებულება არ იყო, რომ მათ დაზვერვის სამსახურისთვის ეთქვათ, ჩვენი სპეციფიკა სულ სხვაა, მაგრამ კარგი იქნებოდა, გვცოდნოდა", — განაცხადა დავით სუჯაშვილმა.

ცნობისთვის, გამოძიების ინტერესი 2019 წლის 24 აგვისტოს სოფელ ჩორჩანასთან, საოკუპაციო ხაზის გასწვრივ განთავსებული საგუშაგო და განვითარებული პროცესებია.