კანის კინოფესტივალისა და ლუმიერების ინსტიტუტის დირექტორი ტიერი ფრემო, სულ მალე, შესაძლოა, საქართველოს საქმიანი ვიზიტით ეწვიოს.

ფესტივალის მსვლელობის დროს, ეროვნული კინოცენტრის საერთაშორისო დეპარტამენტის უფროსი დავით ვაშაძე კინოფესტივალის დირექტორს შეხვდა.

სწორედ ამ შეხვედრაზე გადაწყდა, რომ ფრემოს წიგნი Selection Officielle ქართულ ენაზე ითარგმნოს.

"რამდენიმე მიზეზია რის გამოც ამ წიგნის თარგმნა გადავწყვიტეთ. პირველი ეს არის მისი საგანმანათლებლო დანიშნულება. ფრემო წიგნში ყვება კანის ფესტივალის მთელ პროცესს, როგორ ირჩევს ფილმებს, რას აქცევს ყურადღებას, რაც ვფიქრობ კარგი მასალა იქნება ქართველი რეჟისორებისთვის. მეორე მიზეზი თვითონ წიგნია, რომელშიც ძალიან საინტერესო ამბებია თავმოყრილი და მალევე გახდა პოპულარული არა მხოლოდ კინომოყვარულებში, არამედ ჩვეულებრივ მკითხველშიც და რაც მთავარია, მესამე მიზეზი, ეს ზოგადად ტიერისთვის ქართული კინოს გაცნობა და ლობირებაა, რომ შემდეგში ფესტივალებზე უფრო ფართოდ იყოს ჩვენი კინო წარმოჩენილი", უთხრა On.ge-ს ეროვნული კინოცენტრის საერთაშორისო დეპარტამენტის უფროსმა დავით ვაშაძემ.

აღსანიშნავია, რომ ტიერი ფრემომ სურვილი გამოთქვა საქმიანი ვიზიტით საქართველოსაც ეწვიოს და მისი ფილმი Lumière ქართულ აუდიტორიას წარუდგინოს.