Breaking Bad-ის ლეგენდარულმა ეპიზოდმა ოზიმანდიასმა IMDb-ზე 10/10 რეიტინგი დაკარგა. ეპიზოდი, რომლის პრემიერაც 2013 წელს შედგა, ერთადერთი იყო სერიალების ისტორიაში, რომელსაც პლატფორმაზე სრულყოფილი შეფასება ჰქონდა.

თუმცა, სულ რამდენიმე დღეში, ოზიმანდიასმა ყველაზე მაღალრეიტინგული ეპიზოდების სიაში 1-ელიდან 42-ე ადგილზე ჩამოინაცვლა. მისი ამჟამინდელი შეფასება 10-დან 9.8 ქულაა.

ფოტო: IMDb

მიზეზი, რომელმაც ეპიზოდის შეფასება წლების შემდეგ, თითქოს მოულოდნელად, შეცვალა, შვიდი სამეფოს რაინდს უკავშირდება. სამეფო კარის თამაშების მაყურებელს 2026 წელი ახალი სერიალის გამოსვლამ გაუხალისა. შვიდი სამეფოს რაინდმა სოციალურ მედიაში საკმაოდ კარგი შეფასება და გამოხმაურება დაიმსახურა, სერიალის მეხუთე ეპიზოდმა კი IMDb-ზე Breaking Bad-ის რეკორდი გაიმეორა და 10/10 რეიტინგი მიიღო.

შვიდი სამეფოს რაინდი

შვიდი სამეფოს რაინდი

ფოტო: HBO Max

ამის მიუხედავად, ეს სრულყოფილი შეფასება დიდხანს არ გაგრძელებულა. მალევე, ეპიზოდმა ათასობით უარყოფითი, კონკრეტულად კი, 10-დან 1 ქულა მიიღო. როგორც ონლაინ მედიები მსჯელობენ, ეს უარყოფითი შეფასებები Breaking Bad-ის ფანებს უკავშირდება, რომლებსაც არ სურდათ, რომ უმაღლესი შეფასება სხვა სერიალთან გაეყოთ. ამჟამად ეპიზოდს 9.7 რეიტინგი აქვს.

ფოტო: IMDb

პასუხი არც შვიდი სამეფოს რაინდის ფანებმა დააყოვნეს: Breaking Bad-ის ყველაზე მაღალრეიტინგულმა ეპიზოდმა — ოზიმანდიასმაც — მალევე მიიღო მათგან უარყოფითი შეფასებები, რის შედეგადაც, რეიტინგის სათავეს საერთოდ ჩამოშორდა.

Breaking Bad-ისა და შვიდი სამეფოს რაინდის მაყურებლის დაპირისპირებამ აშკარა გახადა, რომ ზოგჯერ ფილმებისა და სერიალების სიყვარული მარტივად იქცევა უბრალო თაყვანისცემიდან შეჯიბრად და დაპირისპირებად. ამ დაპირისპირების შედეგად კი, IMDb-ზე ყველაზე მაღალრეიტინგული ეპიზოდი 9.9 ქულით უკვე სერიალ Six Feet Under-ს ეკუთვნის.

ასევე იხილეთ: