უკრაინის პრეზიდენტმა, ვოლოდიმირ ზელენსკიმ რუსეთის უკრაინაში შეჭრის მეოთხე წლისთავთან დაკავშირებით ვიდეო მიმართვა გამოაქვეყნა, სადაც ამბობს, რომ თუ შეჭრის დასაწყისს და დღევანდელ დღეს გადავხედავთ, "სრული უფლება გვაქვს ვთქვათ: ჩვენ დავიცავით ჩვენი დამოუკიდებლობა, არ დაგვიკარგავს სახელმწიფოებრიობა; პუტინმა ვერ მიაღწია თავის მიზნებს." მისივე თქმით, რუსეთმა ვერ გატეხა უკრაინელები და ვერ მოიგო ომი.

"დღეს ზუსტად ოთხი წელი შესრულდა მას შემდეგ, რაც პუტინმა კიევის ასაღებად სამდღიანი იერიში დაიწყო. ეს ბევრ რამეს ამბობს ჩვენს წინააღმდეგობაზე და იმაზე, თუ როგორ იბრძოდა უკრაინა მთელი ამ ხნის განმავლობაში. ამ სიტყვების უკან დგას მილიონობით ჩვენი ადამიანი, უსაზღვრო სიმამაცე, წარმოუდგენლად მძიმე შრომა, გამძლეობა და ის გრძელი გზა, რომელსაც უკრაინა 24 თებერვლის შემდეგ გადის.

თუ გადავხედავთ შეჭრის დასაწყისს და დღევანდელ დღეს, სრული უფლება გვაქვს ვთქვათ: ჩვენ დავიცავით ჩვენი დამოუკიდებლობა, არ დაგვიკარგავს სახელმწიფოებრიობა; პუტინმა ვერ მიაღწია თავის მიზნებს. მან ვერ გატეხა უკრაინელები; მან ვერ მოიგო ეს ომი. ჩვენ შევინარჩუნეთ უკრაინა და ყველაფერს გავაკეთებთ მშვიდობისა და სამართლიანობის უზრუნველსაყოფად. დიდება უკრაინას!"— განაცხადა ვოლოდიმირ ზელენსკიმ ვიდეომიმართვაში.

შეგახსენებთ, რუსეთი უკრაინაში 2022 წლის 24 თებერვალს შეიჭრა. ამ დღეს რუსეთის პრეზიდენტმა, ვლადიმერ პუტინმა უკრაინის "დემილიტარიზაციასა და დენაციფიკაციისთვის" "სპეციალური სამხედრო ოპერაციის" დაწყება გამოაცხადა და რამდენიმე წუთში, უკრაინის ყველა რეგიონში საჰაერო და სარაკეტო იერიშები დაიწყო.

მანამდე, 2014 წელს რუსეთი ყირიმში შეიჭრა და მიიერთა ის, ასევე რუსეთის მიერ მხარდაჭერილმა სეპარატისტებმა დაიკავეს დონბასის ნაწილი სამხრეთ-აღმოსავლეთ უკრაინაში, კერძოდ ლუჰანსკისა და დონეცკის ოლქები.