უკრაინაში რუსეთის შეჭრის მეოთხე წლისთავთან დაკავშირებით ევროპული საბჭოს პრეზიდენტი, შარლ მიშელი, ევროკომისიის პრეზიდენტი, ურსულა ფონ დერ ლაიენი და ევროპარლამენტის პრეზიდენტი, რობერტა მეცოლა ერთობლივ განცხადებას ავრცელებენ.

განცხადებაში წერია, რომ რუსეთს უკრაინაში თავისი სამხედრო მიზნებისთვის არ მიუღწევია და ბრძოლის ველზე წინ ვერ მიიწევს. მათი განმარტებით, ევროკავშირის მიზანია უკრაინისთვის ყოვლისმომცველი, სამართლიანი და ხანგრძლივი მშვიდობა, რომელიც ეფუძნება გაეროს წესდების პრინციპებსა და საერთაშორისო სამართალს. ევროპელი პოლიტიკოსები ხაზს უსვამენ რთულ საერთაშორისო და გეოპოლიტიკურ გარემოში უკრაინის მიმართ ტრანსატლანტიკური და გლობალური სოლიდარობის შენარჩუნების მნიშვნელობას. მათივე თქმით, ევროკავშირი გააგრძელებს უკრაინისა და მისი ხალხის ყოვლისმომცველ პოლიტიკურ, ფინანსურ, ეკონომიკურ, ჰუმანიტარულ, სამხედრო და დიპლომატიურ მხარდაჭერას.

"ოთხი წლის წინ, რუსეთმა დაიწყო სრულმასშტაბიანი და უკანონო აგრესიული ომი უკრაინის წინააღმდეგ. ჩვენ კიდევ ერთხელ მივაგებთ პატივს უკრაინის მამაც ხალხს, რომელიც აგრძელებს წინააღმდეგობას და საკუთარი ქვეყნის დაცვას.

რუსეთს უკრაინაში თავისი სამხედრო მიზნებისთვის არ მიუღწევია. ვინაიდან რუსეთი ბრძოლის ველზე წინ ვერ მიიწევს, იგი განზრახ ესხმის თავს უკრაინის სამოქალაქო და კრიტიკულ ინფრასტრუქტურას, მათ შორის ენერგოობიექტებს, საავადმყოფოებს, სკოლებსა და საცხოვრებელ შენობებს მკაცრი ზამთრის პირობებში. უკრაინელები კვლავაც ურყევნი არიან თავიანთ სიმტკიცეში, გამბედაობასა და გამძლეობაში.

ევროკავშირი რუსეთის აგრესიის პირველივე დღიდან მტკიცედ დგას უკრაინისა და მისი ხალხის გვერდით. ჩვენი მიზანია უკრაინისთვის ყოვლისმომცველი, სამართლიანი და ხანგრძლივი მშვიდობა, რომელიც ეფუძნება გაეროს წესდების პრინციპებსა და საერთაშორისო სამართალს. ჩვენ მხარს ვუჭერთ ყველა მცდელობას, რომელიც მიმართულია ასეთი მშვიდობის მისაღწევად — მშვიდობისა ღირსებითა და გრძელვადიანი უსაფრთხოებით. სუვერენიტეტისა და ტერიტორიული მთლიანობის პატივისცემა ქვაკუთხედია. არცერთ ქვეყანას არ შეუძლია მეზობლის ანექსია. საზღვრების შეცვლა ძალით შეუძლებელია. აგრესორი ვერ იქნება წახალისებული. ამჟამინდელ რთულ საერთაშორისო და გეოპოლიტიკურ გარემოში, ჩვენ ხაზს ვუსვამთ უკრაინის მიმართ ტრანსატლანტიკური და გლობალური სოლიდარობის შენარჩუნების მნიშვნელობას.

ევროკავშირი გააგრძელებს უკრაინისა და მისი ხალხის ყოვლისმომცველ პოლიტიკურ, ფინანსურ, ეკონომიკურ, ჰუმანიტარულ, სამხედრო და დიპლომატიურ მხარდაჭერას. ჩვენ ვრჩებით უკრაინის უმსხვილეს დონორად. 2022 წლის შემდეგ გაწეულ თითქმის 200 მილიარდი ევროს ოდენობის მხარდაჭერასთან ერთად, ევროპელი ლიდერები შეთანხმდნენ, რომ უკრაინას 2026-27 წლებში 90 მილიარდ ევროს გამოუყოფენ. ეს დაეხმარება უკრაინას გადაუდებელი საბიუჯეტო და თავდაცვის საჭიროებების დაკმაყოფილებაში და რუსეთის თავდასხმების წინაშე სიმტკიცის შენარჩუნებაში. ამ დახმარების პაკეტიდან 60 მილიარდი ევრო დაიხარჯება სამხედრო საჭიროებებზე (პროგრამა "მაჩვზღარბი" / "Porcupine programme"). პირველი გადახდა განხორციელდება რაც შეიძლება მალე", — წერია განცხადებაში.

განცხადებაში აღნიშნულია, რომ გენერატორების გადაუდებელი მიწოდებისა და ჰუმანიტარული დახმარებისთვის მხარდაჭერის ახალი პაკეტი მზადდება. ევროპელი პოლიტიკოსები წერენ, რომ გააძლიერებენ ზეწოლას რუსეთზე, რათა მან აგრესია შეწყვიტოს და ჩაერთოს მშვიდობისკენ მიმართულ შინაარსიან მოლაპარაკებებში. მათივე განმარტებით, ისინი უზრუნველყოფენ, რომ რუსეთმა ჩადენილ დანაშაულებსა და მიყენებულ ზარალზე პასუხი აგოს.

"ამ ზამთარს ევროკავშირმა და მისმა წევრმა ქვეყნებმა უკრაინას უპრეცედენტო ენერგეტიკული დახმარება გაუწიეს საჰაერო თავდაცვისა და დრონსაწინააღმდეგო სისტემების, ისევე როგორც ჰუმანიტარული დახმარების პარალელურად. მზადდება მხარდაჭერის ახალი პაკეტი გენერატორების გადაუდებელი მიწოდებისა და ჰუმანიტარული დახმარებისთვის. უკრაინის ენერგეტიკული მდგრადობის ასამაღლებლად და დღევანდელი საგანგებო სიტუაციის განმეორების თავიდან ასაცილებლად, ჩვენ უკრაინასთან ერთად ვმუშაობთ ენერგეტიკული უსაფრთხოებისა და მზადყოფნის ახალ გეგმაზე, რომელიც ფოკუსირებულია ქსელების შეკეთებასა და გაძლიერებაზე, დაზიანებული ელექტროსადგურების სწრაფ აღდგენასა და განახლებადი ენერგიის დეცენტრალიზებული წარმოების სწრაფ დანერგვაზე.

პუტინის გამომფიტავი ომი სტაბილურად ასუსტებს რუსეთს და ჩვენ მტკიცედ გვაქვს გადაწყვეტილი, გავაძლიეროთ ზეწოლა რუსეთზე, რათა მან შეწყვიტოს აგრესია და ჩაერთოს მშვიდობისკენ მიმართულ შინაარსიან მოლაპარაკებებში. ჩვენი მიზანია გავზარდოთ ზეწოლა რუსეთის ენერგეტიკულ და ფინანსურ სექტორზე და მივიღოთ დამატებითი ზომები "ჩრდილოვანი ფლოტის" წინააღმდეგ.

თუმცა ჩვენი ძალისხმევა უკრაინის მხარდასაჭერად ასევე მიმართულია "შემდეგი დღისკენ" — როდესაც საბრძოლო მოქმედებები დასრულდება. ევროკავშირი და მისი წევრი ქვეყნები, თავიანთი კომპეტენციის ფარგლებში, მზად არიან წვლილი შეიტანონ მტკიცე და საიმედო უსაფრთხოების გარანტიებში, რათა რუსეთმა ვეღარასდროს შეძლოს უკრაინაზე თავდასხმა.

ჩვენ უზრუნველვყოფთ, რომ რუსეთმა პასუხი აგოს ჩადენილ დანაშაულებსა და მიყენებულ ზარალზე. ჩვენ მზად ვართ, რაც შეიძლება მალე, ევროპის საბჭოს ფარგლებში, ავამოქმედოთ უკრაინის წინააღმდეგ აგრესიის დანაშაულის სპეციალური ტრიბუნალი და უკრაინის საერთაშორისო საპრეტენზიო კომისია.

უსაფრთხო და კეთილდღეობის მქონე უკრაინის მომავალი ევროკავშირშია. უკრაინამ მნიშვნელოვან პროგრესს მიაღწია ევროკავშირში გაწევრიანების რეფორმების გზაზე ძალიან რთულ პირობებში. უკრაინას შეუძლია ჩვენი სრული მხარდაჭერის იმედი ჰქონდეს ევროკავშირში გაწევრიანებასა და ომის შემდგომ აღდგენაში.

ჩვენ მტკიცედ ვდგავართ უკრაინის გვერდით. სამართლიანი და ხანგრძლივი მშვიდობისთვის. ძლიერი და სუვერენული უკრაინისთვის ძლიერ და სუვერენულ ევროპაში", — წერია განცხადებაში.