ხმები, რომლებიც წლების განმავლობაში ვრცელდებოდა, საბოლოოდ დადასტურდა: ახალ ფილმში ჰოლივუდის ოქროს ხანის ვარსკვლავს, ოდრი ჰეპბერნს, ლილი კოლინზი განასახიერებს. ნეტფლიქსის სერიალ Emily in Paris-ის მსახიობმა ეს ამბავი თავადაც გაგვიზიარა და ინსტაგრამზე ჰეპბერნის ფოტო გამოაქვეყნა. კოლინზის თქმით, პროექტზე მუშაობა უკვე თითქმის 10 წელია, მიმდინარეობს.

კოლინზისა და ჰეპბერნის გარეგნული მსგავსება ბევრჯერ ყოფილა განხილვის თემა მედიაში. თავის მხრივ, ლილიც ხშირად აღნიშნავდა, რომ ოდრიმ მასზე დიდი გავლენა იქონია. ინგლისელ-ამერიკელ ვარსკვლავს ჰეპბერნის სტილიც არაერთხელ მოურგია ფოტოსესიებზე.

რაც შეეხება კოლინზის ახალ პროექტს, ეს გახლავთ სემ უოსონის ბესტსელერი წიგნის, მეხუთე ავენიუ დილის ხუთ საათზე, ეკრანიზაცია, რომელიც გვიყვება, როგორ იღებდნენ ჰოლივუდის კინოკლასიკას, საუზმე ტიფანისთან. ამდენად, ფილმში არა მხოლოდ ჰეპბერნის ისტორია გაცოცხლდება, არამედ კულუარული ამბებიც, სადაც წიგნის ავტორ თრუმენ კეპოუტის, რეჟისორ ბლეიქ ედვარდსს, კოსტიუმების ლეგენდარულ დიზაინერ ედით ჰედს და კიდევ არაერთ რეალურ პიროვნებას შევხვდებით. ეს ამბები კი თავად ფილმზე ნაკლებად საინტერესო როდია: მხოლოდ ის რად ღირს, რომ კეპოუტი თურმე დაჟინებით მოითხოვდა, თავისი წიგნის ადაპტაციაში მთავარი როლი მერილინ მონროს მიეღო და ჰეპბერნის დამტკიცების გამო, გავრცელებული ცნობით, კინოსტუდიასაც დაუპირისპირდა...

თუმცა, ცხადია, დღეს ვეღარავის წარმოუდგენია ჰოლი გოლაითლის სახედ სხვა ვინმე. ჰეპბერნი ამ როლისთვის ოსკარზეც იყო ნომინირებული, მაგრამ ფილმის გავლენა კინოსამყაროს გასცდა და ოდრის შესრულებული პერსონაჟი მოდის ფუძემდებლად იქცა მზის დიდი სათვალეებით, გრძელი ხელთათმანებით და ჟივანშის საკულტო შავი კაბით.

ოდრი ჰეპბერნი 1993 წელს, 63 წლის ასაკში გარდაიცვალა. გარდა ფილმისა საუზმე ტიფანისთან, მან ასევე ითამაშა კლასიკად ქცეულ კინოსურათებში რომაული არდადეგები და ჩემი მშვენიერი ლედი. თავისი ეპოქის მოდის სიმბოლოდ მიჩნეული ჰეპბერნი აქტიურად ეწეოდა საქველმოქმედო საქმიანობასაც. ერთ-ერთი ბიოგრაფის თანახმად, კინოვარსკვლავი მეორე მსოფლიო ომის დროს ნაცისტებსაც ებრძოდა.

ჰეპბერნის ცხოვრებისადმი ინტერესი საზოგადოებაში დღემდე არ ნელდება და ამაზე მიუთითებს ის არაერთი კინო თუ სატელევიზიო პროექტი, რომელიც ამჟამადაც მუშაობის პროცესშია; უკვე რამდენიმე წელია, მიმდინარეობს მუშაობა სერიალზე, სადაც მთავარი როლის შემსრულებლად სწორედ ლილი კოლინზი განიხილებოდა. ასევე წლებია, ოსკარის ნომინანტი რეჟისორი ლუკა გუადანინო ბიოგრაფიულ ფილმს იღებს, სადაც ჰეპბერნი რუნი მარამ უნდა განასახიეროს.