"ოთხი წლის წინ ევროპამ გაიღვიძა უკრაინაში ჩამოგდებული რუსული ბომბების ხმაზე.

ეს არის რუსეთის მიერ არჩეული აგრესიული ომის ოთხი წელი, საერთაშორისო სამართლის, ხალხის სუვერენიტეტისა და ადამიანის სიცოცხლის აშკარა უგულებელყოფით.

დაბომბილი ქალაქების, განადგურებული სკოლებისა და საავადმყოფოების ოთხი წელი; ენერგეტიკული ინფრასტრუქტურის მეთოდური მიზანში ამოღება, რათა ოჯახები სიცივესა და ტერორში ჩაეფლოთ.

ოთხი წელი: 15 000 მოკლული უკრაინელი მშვიდობიანი მოქალაქე.

განადგურებული სიცოცხლეების ოთხი წელი — ძალადობა, გაუპატიურება, წამება, ომის დანაშაულები და ტერორი.

ოთხი წელი და ათასობით უკრაინელი ბავშვი, რომლებიც მოწყვიტეს საკუთარ მიწასა და ოჯახებს.

მიუხედავად ამისა, უკრაინა უკვე ოთხი წელია მტკიცედ დგას და წინააღმდეგობას უწევს.

დადგება დღე, როდესაც რუსები გააცნობიერებენ მათი სახელით ჩადენილი დანაშაულის მასშტაბებს, მოყვანილი საბაბების სიცარიელეს და იმ დამანგრეველ გრძელვადიან შედეგებს, რაც მათსავე ქვეყანას მიადგა.

მაშინ, როცა კრემლი უკრაინის რამდენიმე დღეში დაპყრობას აპირებდა, 2022 წლის ნოემბერში ფრონტის სტაბილიზაციის შემდეგ, მათ უკრაინის ტერიტორიის მხოლოდ 1% დაიკავეს. გასულ თვეში უკრაინამ პოზიციების დაბრუნებაც კი შეძლო.

და რა ფასად დაუჯდათ ეს რუსებს?

1.2 მილიონზე მეტი რუსი ჯარისკაცი დაიჭრა ან დაიღუპა — ეს არის რუსეთის საბრძოლო დანაკარგების ყველაზე დიდი მაჩვენებელი მეორე მსოფლიო ომის შემდეგ.

ამ დანაკარგების ფონზე, რუსეთი აფრიკის კონტინენტზე ახდენს პირების რეკრუტირებას უკრაინის ფრონტზე საბრძოლველად გასაგზავნად, ხშირად ყოველგვარი წინასწარი მომზადების გარეშე.

ეს ომი რუსეთისთვის სამმაგი მარცხია: სამხედრო, ეკონომიკური და სტრატეგიული.

მან გააძლიერა ნატო — სწორედ ის გაფართოება, რომლის აღკვეთასაც რუსეთი ცდილობდა; გააერთიანა ევროპელები, რომელთა დასუსტებასაც ის იმედოვნებდა და გამოააშკარავა სხვა ეპოქის იმპერიალიზმის სისუსტე.

ვინაიდან უკრაინა ჩვენი კონტინენტის თავდაცვის პირველი ხაზია, საფრანგეთი და ევროპა გადამჭრელად დგანან მის გვერდით.

ფინანსური, სამხედრო, ჰუმანიტარული და ენერგეტიკული დახმარება: ევროპამ უკვე მოახდინა 170 მილიარდი ევროს მობილიზება. დეკემბერში ევროპულ საბჭოზე ჩვენ შევთანხმდით 90 მილიარდი ევროს ოდენობის სესხზე, რათა უკრაინას მომდევნო ორი წლის განმავლობაში პროგნოზირებადი დაფინანსება ჰქონდეს. ამის კითხვის ნიშნის ქვეშ დაყენების არავითარი გამართლება არ არსებობს. ჩვენ ეს უნდა შევასრულოთ.

გაგრძელდება აღჭურვილობისა და საბრძოლო მასალის მიწოდება, წვრთნები, საჰაერო თავდაცვისა და ანტი-დრონული შესაძლებლობების გაძლიერება, ასევე უკვე მიწოდებული სისტემების მხარდაჭერა.

ეს ყველაფერი იმისთვის, რომ უკრაინამ შეძლოს პოზიციების შენარჩუნება — და რუსეთმა გაიგოს, რომ დრო მის სასარგებლოდ არ მუშაობს.

ჩვენ ასევე გავაგრძელებთ რუსეთის სამხედრო ეკონომიკის მიზანში ამოღებას: არ გადავუხვევთ სანქციების კურსს და გავაძლიერებთ მოქმედებებს "ჩრდილოვანი ფლოტის" წინააღმდეგ.

რადგან მშვიდობა უსაფრთხოების გარეშე შეუძლებელია — და რადგან ჩვენი უსაფრთხოების ბედი უკრაინაში წყდება — ჩვენ გავაგრძელებთ ჩართულობას "კეთილი ნების კოალიციის" ფარგლებში.

6 იანვარს პარიზში ჩვენ მივაღწიეთ მტკიცე თანხვედრას შეერთებულ შტატებთან მომავალი უსაფრთხოების გარანტიებთან დაკავშირებით. დღევანდელმა ახალმა შეხვედრამ საშუალება უნდა მოგვცეს, წინსვლა გავაგრძელოთ.

ჩვენ ასევე უზრუნველვყოფთ, რომ ევროპელების ინტერესები სათანადოდ იყოს გათვალისწინებული დისკუსიებში, მათ შორის — როცა ამის დრო დადგება — ჩვენი კონტინენტისთვის საჭირო უსაფრთხოების არქიტექტურის საკითხებში.

უკრაინელო ქალებო და კაცებო: ჩვენ თქვენზე დიდი ემოციით ვფიქრობთ. თქვენს ოჯახებზე, რომლებმაც ამდენს გაუძლეს, თქვენს ბავშვებზე და ყველაზე, ვინც აგრძელებს წინააღმდეგობას თავდასხმების ფონზე.

მათ, ვისაც ჰგონია, რომ ჩვენ დავიღლებით, ცდებიან. ჩვენ ვართ და დავრჩებით უკრაინის გვერდით".