მშობლები "ზოგადი განათლების შესახებ" კანონში შეტანილ ცვლილებს აპროტესტებენ, რომლის თანახმადაც 15 სექტემბრის შემდეგ დაბადებული ბავშვები სკოლაში შესვლას ვეღარ შეძლებენ.

მშობლების განმარტებით, აღნიშნული გადაწყვეტილება ქართული ოცნების პარლამენტმა ნაჩქარევად მიიღო — იმ დროს, როდესაც მოსწავლეთა რეგისტრაცია 2 კვირაში დაიწყო და ბავშვები და ოჯახები რეალურად მზად იყვნენ სწავლის დასაწყებად. აღნიშნულ საკითხზე პარლამენტში პეტიციაც შეიტანეს, თუმცა უარი მიიღეს.

"უახლესი ანალიზი/ნაშრომი, რაც ამ თემაზე მშობლებმა მოვიძიეთ და ზოგადი განათლების განახლებულ კონცეფციას განიხილავს, ამბობს, რომ — "დასაბუთებული მსჯელობის გარეშე, კონცეფციაში 3-თვიანი ცვლილება წარმოდგენილია, როგორც განათლების საფეხურებს შორის ტრანზიციის გამარტივების გზა. ბავშვის ასაკი არ შეიძლება იყოს ერთადერთი ინდიკატორი იმის განსასაზღვრად, არის, თუ არა მზად ის სკოლისთვის," — ვკითხულობთ მშობლების საერთო განცხადებაში.

მათივე განმარტებით ცვლილება 15 წლის წინანდელ, 2011 წლის კვლევას ეფუძნება, სადაც არ არის საუბარი იმ ბავშვებზე, რომლებიც სკოლის დაწყებიდან მოკლე ხანში 6 წლის ასაკს მიაღწევენ.

"თქვენ მიერ დასახელებულ 2011 წელს UNICEF-ის მიერ ჩატარებულ კვლევაში არ არის საუბარი იმაზე, რომ ბავშვი, რომელსაც 6 წლამდე აკლია 2-3 დღე ან რამდენიმე კვირა, არ უნდა იქნეს მიღებული პირველ კლასში; გარდა ამისა, 2022–2025 წლებში სკოლაში მისაღები ასაკობრივი ზღვარი ყოველწლიურად იზრდებოდა. აღნიშნული კვლევა ამ პერიოდშიც არსებობდა, თუმცა ამან ვერ შეუშალა ხელი ასაკობრივი ზღვრის ეტაპობრივ ზრდას, რამაც ჩვენ, მშობლებს, შეგვიქმნა მოლოდინი, რომ ჩვენი შვილები 2026 წლის სექტემბერში სკოლაში უნდა მისულიყვნენ," — წერს მარიამ ბუხუა სოციალურ ქსელში.

პეტიციაში მშობლები ასევე ითხოვდნენ 6 წლამდე მიუღწეველი ბაშვების სკოლისთვის მზაობის ინდივიდუალურ შეფასებას, რაზეც განათლების სამინისტროში განუცხადეს, რომ "შეუძლებელია". მშობლების განმარტებით, "ეს მიდგომა ცხადყოფს, რომ არსებული რეგულაცია ვერ ითვალისწინებს ბავშვის ინდივიდუალურ საჭიროებებსა და განვითარების თავისებურებებს".

კომიტეტზე ასევე გაჟღერდა შეთავაზება, რომ საჭიროების შემთხვევაში, ისინი მზად არიან ფსიქოლოგების ჩართულობით დაგვეხმარონ ჩვენ, ბავშვებსა და მშობლებს ამ ეტაპის გადალახვაში. თუმცა, მშობლების აზრით, ეს მიდგომა არასწორია.

"სახელმწიფოს მთავარი მიზანი უნდა იყოს ბავშვის საუკეთესო ინტერესების გათვალისწინება, მისი სწორი გაგებით, რაც გულისხმობს იმას, რომ არ უნდა მოხდეს ბავშვისთვის ფსიქოლოგიური ან ფიზიკური ზიანის მიყენება ხელოვნური გზით," — წერია მშობლების მიერ შედგენილ პეტიციაში.

მშობლებმა აღნიშნულ თემაზე ოცნების პრემიერ ირაკლი კობახიძეს და სახალხო დამცველს შეხვედრის ჩანიშვნისა და საკითხის განხილვის თხოვნით მიმართეს, რათა არგუმენტები წარუდგინონ და ბავშვთა უფლებები და ინტერესები დაიცვან.