ალბათ, შეგიმჩნევიათ, რომ ელექტროენერგია ზამთრის სეზონზე უფრო ხშირად ითიშება. ამას რამდენიმე მიზეზი აქვს:

ელექტროენერგიის გათიშვა ცივ ამინდში

ელექტროსისტემა შედგება ათასობით კომპონენტისგან, რომლებიც, ძირითადად, ელექტრომექანიკურია, უამრავი მოძრავი ნაწილით. არსებობს დიაპაზონი, რომლის ფარგლებშიც ეს კომპონენტები საუკეთესოდ მუშაობს. როდესაც ამინდი ძალიან ცივი ან ცხელია, ან ტენიანობის დონე სცილდება დიაპაზონს, ელექტროსისტემა ნაკლები ეფექტიანობით მუშაობს. ამ მოძრავ კომპონენტებს დასჭირდება ცოტა უფრო ძლიერად მუშაობა, რათა მიაღწიოს იმავე შედეგს, როგორსაც უფრო ხელსაყრელი დღის შემთხვევაში მიაღწევდა. გარდა ამისა, ინფრასტრუქტურა ძველდება, რაც ართულებს ელექტროსისტემის ექსტრემალური ამინდის მოვლენებზე რეაგირებას.

ყინული ელექტროგადამცემ ხაზებზე

ზამთრის ამინდი ხშირად ხასიათდება ავდრებითა და ქარბუქებით. ყინული და თოვლი ზოგჯერ გროვდება ელექტროგადამცემ ხაზებზე და ხის ტოტებზე, რამაც შეიძლება გამოიწვიოს მათი გატეხა ან დაცემა ამ ხაზებზე, რაც გათიშავს ელექტროენერგიას. მაშინაც კი, თუ თოვლი ან ქარბუქი არ არის, პრობლემას წარმოადგენს ხის ფესვები, რომლებიც ქმნის ყინულის გზას მიწისქვეშა ელექტროგადამცემი ხაზების ირგვლივ, რაც აფერხებს ელექტროენერგიის მიწოდებას. ამასთანავე, ცივ ამინდში თბილი ტრანსფორმატორი შეიძლება იყოს ძალიან მიმზიდველი პატარა ცხოველებისთვის, რამაც შეიძლება გამოიწვიოს გაუმართაობა.

გაზრდილი მოთხოვნა ელექტროენერგიაზე

ტემპერატურის კლებასთან ერთად, ადამიანები უფრო მეტ ელექტროენერგიას იყენებენ სახლებისა და სხვა დაწესებულებების გასათბობად, რამაც შეიძლება დატვირთოს ელექტროქსელი, განსაკუთრებით, იმ შემთხვევაში, თუ ელექტროენერგიის მოთხოვნა აღემატება ქსელის წარმოებისა და განაწილების შესაძლებლობებს. თუ ტემპერატურის უკიდურესობა პროგნოზზე უარესია და/ან მოხდება უფრო სწრაფად, ვიდრე პროგნოზირებული იყო, კომუნალურ კომპანიებს, შესაძლოა, არ ჰქონდეთ საკმარისი დრო ან რესურსი ელექტროენერგიაზე გაზრდილი მოთხოვნის დასაკმაყოფილებლად. ამან შეიძლება გამოიწვიოს ადგილობრივი ან უფრო ფართოდ გავრცელებული გადატვირთვა, რაც ზოგჯერ წარმოშობს სერვისის ავტომატურ გათიშვას ან ელექტროენერგიის მიწოდების მონაცვლეობით შეწყვეტას ზოგიერთ უბანში.

ბოლო წლებში უფრო მეტი ადამიანი იყენებს მზის პანელებს საკუთარი ელექტროენერგიის გამოსამუშავებლად. თუმცა, უამინდობის დროს, ამ მოწყობილობების გამომუშავებული ენერგიის რაოდენობა მცირდება და იზრდება იმ ენერგიის რაოდენობა, რომელიც კომუნალურმა კომპანიამ უნდა მიაწოდოს, რაც პრობლემას კიდევ უფრო ამძიმებს. გარდა ამისა, მომხმარებლები, რომლებიც გამოიმუშავებენ ენერგიას ამ მოწყობილობებიდან, მალავენ საცხოვრებლის ან შენობის რეალურ მოთხოვნას კომუნალური კომპანიისგან. ეს ართულებს იმის გაგებას, თუ რა რაოდენობის ელექტროენერგიის მიწოდება უნდა შეეძლოთ მყისიერად, როდესაც ეს წყაროები გამორთულია ან მათგან მიწოდებული ენერგიის რაოდენობა მნიშვნელოვნად შემცირდება.

ცივ ან ცხელ ამინდში ელექტროენერგიის გათიშვის თავიდან ასაცილებლად კომუნალურ კომპანიებს შეუძლიათ მიიღონ გარკვეული ზომები. კერძოდ: დარწმუნდნენ, რომ ელექტროსადგურები სათანადოდ იზოლირებულია; გამოცვალონ მოძველებული ინფრასტრუქტურა; დაამატონ სტატუსის მონიტორინგის აღჭურვილობა და სხვ. ამ ნაბიჯების გადადგმა დიდ ხარჯებთანაა დაკავშირებული, თუმცა აუცილებელია, რათა ელექტროენერგიის ხშირი გათიშვა ავირიდოთ თავიდან.