ქვეყნებმა მწვანე ენერგიის განვითარებისა და გადაცემის სფეროში სტრატეგიული პარტნიორობას ხელი რუმინეთში მოაწერეს.

რატომ არის მნიშვნელოვანი: სამეზობლო და გაფართოების საკითხებში ევროკომისარმა 12 დეკემბერს თქვა, რომ წყალქვეშა გადამცემი ხაზი საქართველოსა და მთელს სამხრეთ კავკასიას რუმინეთთან დააკავშირებს, რაც მწვანე ენერგიის ევროკავშირში ექსპორტს უზრუნველყოფს.

• გეგმის მიზანი რეგიონების ეკონომიკური განვითარების ხელშეწყობა და მათი ევროკავშირთან დაკავშირებაა.
• ევროკომისიის პრეზიდენტმა, ურსულა ფონ დერ ლაიენმა კი დღეს, 17 დეკემბერს განაცხადა, რომ შავი ზღვის კაბელი საქართველოს ელექტროენერგიის ჰაბად აქცევს.
• ლაიენის თქმით, შავი ზღვის ორი სანაპირო არასდროს ყოფილა ასე ახლოს

დეტალები: დოკუმენტს ხელი მოაწერეს საქართველოს პრემიერმინისტრმა, ირაკლი ღარიბაშვილმა, აზერბაიჯანის პრეზიდენტმა, ილჰამ ალიევმა, რუმინეთის პრემიერმინისტრმა ნიკოლაე ჩუკამ და უნგრეთის პრემიერმინისტრმა, ვიქტორ ორბანმა.

• ცერემონიას ევროკომისიის პრეზიდენტი ურსულა ფონ დერ ლაიენი დაესწრო.
• დოკუმენტის ხელმოწერამდე გაიმართა პლენარულ სესია — "სტრატეგიული პარტნიორობა მწვანე ენერგეტიკის განვითარებისა და გაზიარების საკითხებში"

განცხადებები: რუმინეთის პრეზიდენტის თქმით, შავი ზღვის გავლით ელექტროენერგიის გადამცემი წყალქვეშა კაბელის პროექტი არის ამბიციური შეთანხმება.

• ალიევმა კი აღნიშნა, რომ აზერბაიჯანი, საქართველო, რუმინეთი და უნგრეთი ერთი გუნდის პრინციპით უნდა მუშაობდნენ და მჭიდროდ თანამშრომლობდნენ ევროკავშირთან.
• "ჩვენ ვაპირებთ, ყველაზე გრძელი ელექტროენერგიის კაბელი ავაგოთ, ეს არის ინოვაცია, მე რომ ვიყო 30 წლით ახალგაზრდა, ვიტყოდი, რომ ეს არის ნამდვილი როკენროლი, რომ ყველაზე გრძელი კაბელი იდება შავი ზღვის ფსკერზე", — თქვა უნგრეთის პრემიერმინისტრმა, ვიქტორ ორბანმა.
• ირაკლი ღარიბაშვილის განცხადებით, საქართველოს გეო-სტრატეგიული მდებარეობა დასავლეთისა და აღმოსავლეთის დამაკავშირებელ ხიდად აქცევს — "რაც უმნიშვნელოვანესი კვანძია ევროკავშირის გლობალური დაკავშირებადობის რუკაზე სატრანსპორტო მარშრუტების დივერსიფიკაციისა და ევროპისადმი ენერგო რესურსების მიწოდების კონტექსტში".

ღარიბაშვილის თქმით, 2020 წლის ივნისში, მსოფლიო ბანკმა ანგარიში გამოაქვეყნა შავი ზღვის წყალქვეშა კაბელის წინასწარი ეკონომიკური ანალიზის საფუძველზე, რითაც ხსენებული პროექტის ეკონომიკური მიზანშეწონილობა დადასტურდა.

• მანვე აღნიშნა, რომ 2021 წლის 26 აპრილს, საქართველოს მთავრობამ კონკურსი გამოაცხადა შავი ზღვის წყალქვეშა ელექტრო კაბელის და ციფრული კავშირის მშენებლობის პროექტის ტექნიკურ-ეკონომიკური დასაბუთების ჩასატარებლად.
• "შერჩევა მსოფლიო ბანკის შესყიდვების პროცედურებით განხორციელდა და გამარჯვებული გამოცხადდა. კვლევა 2022 წლის 11 მაისს დაიწყო და იქედან 18 თვეში დასრულდება".