ბრიტანელმა ექიმებმა ლეიკემიის აგრესიული ფორმის მქონე 13 წლის პაციენტს ახალი ტიპის თერაპია ჩაუტარეს და ავადმყოფობა შეუსუსტეს.

13 წლის ალისას 2021 წელს დაუსვეს T-უჯრედოვანი მწვავე ლიმფობლასტური ლეიკემიის დიაგნოზი. მისი სისხლის სიმსივნე არ რეაგირებდა ჩვეულებრივ მკურნალობაზე, მათ შორის, ქიმიოთერაპიასა და ძვლის ტვინის გადანერგვაზე.

ასევე იხილეთ: რატომ ემართებათ ბავშვებს ლეიკემია — 30-წლიანი კვლევის შედეგები

ალისამ მონაწილეობა მიიღო ლონდონის დიდი ორმონდის ქუჩის ბავშვთა საავადმყოფოს (GOSH) კლინიკურ კვლევაში, რომელშიც გამოიყენეს ჯანმრთელი მოხალისის გენმოდიფიცირებული იმუნური უჯრედები. როგორც 13 წლის ალისამ განაცხადა, მას სურდა, კლინიკურ კვლევაში მონაწილეობა მიეღო არა მხოლოდ საკუთარი თავისთვის, არამედ სხვა ბავშვებისთვისაც.

28 დღეში მისი სიმსივნე შესუსტდა, რამაც მას საშუალება მისცა, მეორედ გადაენერგა ძვლის ტვინი იმუნური სისტემის აღსადგენად. მას შემდეგ 6 თვე გავიდა, ბავშვი თავს კარგად გრძნობს და მასზე ზედამხედველობა მიმდინარეობს.

"ამ ექსპერიმენტული მკურნალობის გარეშე, ალისას ერთადერთი ვარიანტი პალიატიური მზრუნველობა იყო", — ნათქვამია საავადმყოფოს განცხადებაში.

რობერტ კიესამ, GOSH-ის კონსულტანტმა, აღნიშნა, რომ ბავშვის გამოკეთება "საკმაოდ აღსანიშნავი" იყო, თუმცა ჯერ კიდევ საჭიროა შედეგებზე მონიტორინგი და მათი დადასტურება რამდენიმე თვის შემდეგ.

ზოგადად, მწვავე ლიმფობლასტური ლეიკემია (ALL) არის კიბოს ყველაზე გავრცელებული სახეობა ბავშვებში და გავლენას ახდენს იმუნური სისტემის უჯრედებზე, რომლებიც ცნობილია როგორც B და T უჯრედები, რომლებიც ებრძვის ვირუსებს და იცავს ორგანიზმს მათგან.

GOSH-ის თქმით, ალისა იყო პირველი პაციენტი, რომელსაც მიეცა ბაზა-ჩასწორებული T უჯრედები, რაც გულისხმობს ერთეული ნუკლეოტიდური ბაზების ქიმიურ გარდაქმნას — დნმ-ის კოდის ასოებს — რომლებიც ატარებს მითითებებს კონკრეტული ცილისთვის.

ასევე იხილეთ: კიბო ჩვეულებრივ გაციებას დაემსგავსება — მომავლის 3 პროგნოზი მიჩიო კაკუსგან

GOSH-ისა და ლონდონის საუნივერსიტეტო კოლეჯის მკვლევრებმა ხელი შეუწყვეს გენომ-ჩასწორებული T უჯრედების განვითარებას B-უჯრედოვანი ლეიკემიის სამკურნალოდ 2015 წელს. მაგრამ ლეიკემიის სხვა ტიპების სამკურნალოდ, გუნდს უნდა გადაელახა გამოწვევა, რომელიც გულისხმობდა, რომ სიმსივნური უჯრედების ამოცნობისა და თავდასხმისთვის შექმნილი T უჯრედები წარმოების პროცესში ერთმანეთს ანადგურებდა. ამდენად, საჭირო იყო დნმ-ის მრავალი დამატებითი ცვლილება ბაზა-ჩასწორებულ უჯრედებში, რათა მათ შესძლებოდა კიბოს უჯრედების მიზანში ამოღება ერთმანეთის დაზიანების გარეშე.

"ეს არის შესანიშნავი დემონსტრირება იმისა, თუ როგორ შეგვიძლია, ექსპერტთა გუნდებითა და ინფრასტრუქტურით, ლაბორატორიაში უახლესი ტექნოლოგიების დაკავშირება საავადმყოფოში მყოფი პაციენტების რეალურ შედეგებთან", — თქვა GOSH-ის კონსულტანტმა იმუნოლოგმა და პროფესორმა ვასიმ ქასიმმა.

ქასიმის თქმით, ეს არის ყველაზე დახვეწილი უჯრედული ინჟინერია, რაც კი აქამდე შექმნილა. იგი გზას უხსნის სხვა ახალი ტიპის მკურნალობას და, საბოლოოდ, უკეთეს მომავალს ლეიკემიით დაავადებული ბავშვებისთვის.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.