ამის შესახებ NATO-ს გენერალურმა მდივანმა, იენს სტოლტენბერგმა პრესკონფერენციაზე განაცხადა.

რატომ არის მნიშვნელოვანი: პოლონეთის საგარეო საქმეთა სამინისტრომ გუშინ, 15 ნოემბერს განაცხადა, რომ რუსული წარმოების რაკეტა პოლონურ სოფელ პრჟევოდოვზე, უკრაინის საზღვართან ჩამოვარდა, რის შედეგადაც ორი ადამიანი დაიღუპა.

  • პოლონეთის პრეზიდენტმა, ანჟეი დუდამ დღეს, 16 ნოემბერს თქვა, რომ ჩამოვარდნილი რაკეტები, სავარაუდოდ, უკრაინის თავდაცვას უკავშირდება;
  • მისი განცხადებით, ეს იყო რუსული წარმოების S-300 რაკეტა, თუმცა არ აქვთ მტკიცებულება, რომ ის რუსულმა მხარემ გაისროლა.

დეტალები: დუდას მსგავსად, სტოლტენბერგმაც თქვა, რომ წინასწარი მონაცემებით, რაკეტები უკრაინის თავდაცვას უკავშირდება.

  • "ჩვენი წინასწარი ანალიზი ვარაუდობს, რომ ინციდენტი სავარაუდოდ გამოწვეული იყო უკრაინის საჰაერო თავდაცვის რაკეტით, რომელიც გასროლილი იქნა უკრაინის ტერიტორიის დასაცავად რუსული საკრუიზო რაკეტებისგან", — თქვა მან.
  • "მაგრამ ნება მომეცით მკაფიოდ განვაცხადო, ეს არ არის უკრაინის ბრალი. რუსეთი ეკისრება საბოლოო პასუხისმგებლობას, რადგან ის აგრძელებს უკანონო ომს უკრაინის წინააღმდეგ", — დაამატა სტოლტენბერგმა.
  • "ჩვენ არ გვაქვს მინიშნება, რომ რუსეთი ამზადებს შეტევითი სამხედრო მოქმედებების ნატოს წინააღმდეგ".

მანამ, სანამ პოლონეთში რაკეტა ჩამოვარდებოდა, ოკუპანტებმა ერთდროულად უკრაინის რამდენიმე ქალაქსა და რეგიონზე მიიტანეს იერიში. შესაბამისად, უკრაინა საჰაერო თავდაცვისთვის იყენებდა რაკეტებს.

  • უკრაინის საჰაერო სარდლობის ცნობით, რუსეთმა უკრაინის მიმართულებით 100 რაკეტა გაისროლა.
  • დაზიანებულია საცხოვრებელი სახლები და ენერგეტიკული ინფრასტრუქტურა.