აშშ-ის თავდაცვის დეპარტამენტის პრესმდივნის, პეტ რაიდერის განცხადებით, ამერიკის შეერთებულმა შტატებმა იცის ინფორმაცია მედიაში გავრცელებულ ცნობებზე, რომ ორი რუსული რაკეტა პოლონეთის საზღვრის მახლობლად ჩამოვარდა, თუმცა, ჯერჯერობით ვერ ადასტურებენ.

რატომ არის მნიშვნელოვანი: NATO-ს წევრ პოლონეთში ორი რუსული რაკეტა ჩამოვარდა, შედეგად კი ორი ადამიანი დაიღუპა.

  • ინფორმაცია თავდაპირველად სხვადასხვა, მათ შორის, ადგილობრივმა მედიებმა გაავრცელეს.
  • პოლონეთის ხელისუფლებას ინფორმაცია ჯერჯერობით არ დაუდასტურებია.

თავდაცვის დეპარტამენტში ამბობენ, რომ აშშ NATO-ს მთელ ტერიტორიას დაიცავს, თუმცა დამატებით ინფორმაციას ელოდებიან.

  • "როდესაც საქმე ძალების დაცვას ეხება, ჩვენ ყოველთვის ძალიან სერიოზულად ვიღებთ ჩვენი ჯარების უსაფრთხოებას, მიუხედავად იმისა, თუ სად მსახურობენ ისინი".

გამოხმაურებები: ლატვიის საგარეო საქმეთა მინისტრის, ედგარ რინკევიჩის განცხადებით, NATO-ს წევრი ქვეყნის ტერიტორიაზე რუსული რაკეტების ჩამოგდება კრემლის მხრიდან ძალიან საშიში ესკალაციაა.

  • ლიეტუვის პრეზიდენტმა, გიტანას ნაუსედამ პოლონეთს მტკიცე სოლიდარობა გამოუცხადა და დაწერა, რომ NATO-ს მთელი ტერიტორია დაცული უნდა იყოს.
  • მომხდარს გამოეხმაურა ესტონეთის საგარეო უწყება. მათი განცხადებით, ესტონეთი მზადაა, დაიცვას ალიანსის მთელი ტერიტორია.
  • ლუგანსკის ოლქის სამხედრო ადმინისტრაციის ხელმძღვანელი, სერგეი გაიდაიმ კი დაღუპულების გამო პოლონეთს მიუსამძიმრა და რუსეთს კიდევ ერთხელ უწოდა ტერორისტული სახელმწიფო.