გაეროს ბირთვულმა დამკვირვებელმა განაცხადა, რომ ვერ აღმოაჩინა არადეკლარირებული ბირთვული აქტივობები უკრაინაში სამ ობიექტზე, რომლებიც კიევის მოთხოვნის საფუძველზე გადაამოწმა, რუსეთის "ბინძური ბომბის" ბრალდების საპასუხოდ.

რატომ არის მნიშვნელოვანი: 23 ოქტომბერს რუსეთის თავდაცვის მინისტრი, სერგეი შოიგუ გაერთაინებული სამეფოს, აშშ-ს, თურქეთისა და საფრანგეთის თავდაცვის უწყებების ხელმძღვანელებს დაუკავშირდა და იმის მტკიცება დაიწყო, თითქოს უკრაინა "ბინძური ბომბის" გამოყენებას გეგმავს.

  • ბრალდების პასუხად, უკრაინის თავდაცვის მინისტრი, ალექსეი რეზნიკოვი ესაუბრა თურქ, ფრანგ და ბრიტანელ კოლეგებს და განაცხადა, რომ უკრაინა მზადაა ამ თემაზე ნებისმიერი სადამკვირვებლო მისიისთვის.
  • რუსული სახელმწიფო დეზინფორმაციული მედია საშუალებები ომის დაწყების შემდეგ პერიოდულად ავრცელებენ ინფორმაციას იმაზეც, რომ დასავლეთის სახელმწიფოები მხარს უჭერენ უკრაინას ბირთვული იარაღის განვითარებაში და გეგმავენ ყალბი დროშის შეტევებს.

დეტალები: გასულ კვირას, ვლადიმერ პუტინმა თქვა, რომ იცოდა უკრაინაში "ბინძური ბომბის" დამზადების ფაქტის და ასევე ლოკაციის შესახებ, სადაც ის მზადდებოდა.

  • პუტინს თავის გავრცელებულ ბრალდებაზე კონკრეტული მტკიცებულება არ წარმოუდგენია.
  • ზელენსკიმ საპასუხოდ განაცხადა, რომ მსოფლიო რუსეთის ტყუილებს უკრაინული ბინძური ბომბის შესახებ "არ გადაყლაპავდა".
  • "ჩვენი ტექნიკური და სამეცნიერო შეფასების შედეგების მიხედვით, რაც აქამდე გვაქვს, არ აღმოჩნდა არადეკლარირებული ბირთვული აქტივობის კვალი ან რამე მასალა ამ სამ ლოკაციაზე", — აღნიშნა ატომური ენერგიის საერთაშორისო სააგენტომ გავრცელებულ განცხადებაში.