საფრანგეთისა და რუსეთის პრეზიდენტების შეხვედრა ვერსალის სასახლეში დასრულებულია. ემანუელ მაკრონი დღეს, პრეზიდენტის რანგში, პირველად შეხვდა რუს კოლეგას, ვლადიმერ პუტინს.

Deutsche Welle-ს ცნობით, ლიდერებმა ორ ქვეყანას შორის ურთიერთობები განიხილეს, საუბარი ასევე შეეხო სირიაში არსებულ სიტუაციასა და ლგბტ ადამიანების უფლებებს ჩეჩნეთში.

შეხვედრის შემდეგ გამართული ერთობლივი პრესკონფერენციისას, ვლადიმერ პუტინმა, რომელიც ასადის მხარდამჭერია, განაცხადა, რომ ტერორიზმთან საბრძოლველად საჭიროა სტაბილურობა სირიის სახელმწიფოში. პრესკონფერენციაზე მაკრონმა თქვა, რომ მან და პუტინმა ამ თემაზე მოსაზრებები გაცვალეს, თუმცა, ბევრ საკითხზე ვერ შეთანხმდნენ.

ემანუელ მაკრონმა პუტინთან დიალოგისას ჩეჩნეთში ლგბტ თემის უფლებების საკითხი დააყენა და თქვა, რომ ის მუდმივად ყურადღებით აკვირდება ამ თემას.

პუტინთან ერთად გამართული პრესკონფერენციის დროს, მაკრონმა ასევე რუსულ მედიასაშუალებებს "პროპაგანდისტული" უწოდა და განმარტა თუ რატომ აუკრძალა მათ წინასაარჩევნო კამპანიის გაშუქება:

"Russia Today და Sputnik საარჩევნო კამპანიის დროს მცდარ ამბებს აშუქებდნენ პირადად ჩემზე და ჩემს კამპანიაზე".

საფრანგეთის პრეზიდენტის თქმით, ის და პუტინი შეთანხმდნენ, რომ უკვე დროა უკრაინის ახალი სამშვიდობო შეთანხმება გაფორმდეს.

პუტინმა თავის მხრივ თქვა, რომ დასავლეთის სანქციები რუსეთზე, იმ ქმედებებისთვის, რასაც აღმოსავლეთ უკრაინაში აკეთებს, ვერ დაასტაბილურებს იქ სიტუაციას.

გასულ კვირას დიდი შვიდეულის სამიტი გაიმართა და ემანუელ მაკრონი პირველია მასში მონაწილე დასავლელ ლიდერებს შორის, ვინც ვლადიმერ პუტინს შეხვდა.

სამიტზე ემანუელ მაკრონმა აღნიშნა, რომ ბევრი საკითხი არსებობს, რაც რუსეთთან მოლაპარაკების გარეშე ვერ გადაწყდება. მან ასევე თქვა, რომ იგი აღმოსავლეთ უკრაინის კონფლიქტთან მიმართებით დათმობაზე არ წავა.