პოლონეთის თავდაცვის მინისტრმა, მარიუშ ბლაშჩაკმა განაცხადა, რომ რუსეთიდან მოსალოდნელი არალეგალური მიგრაციის აღსაკვეთად პოლონეთი-რუსეთის საზღვრის გასწვრივ ბარიერის მშენებლობა იგეგმება.

რატომ არის მნიშვნელოვანი: უკრაინაში რუსეთის შეჭრის და რეგიონში დაძაბულობის გამო, პოლონეთის ხელისუფლება ვარაუდობს, რომ მოსკოვი გეგმავს ხელი შეუწყოს აზიელი და აფრიკელი მიგრანტების მიერ ევროკავშირის საზღვრის უკანონო კვეთას, კალინინგრადის გავლით.

  • მსგავსი სცენარი განვითარდა გასულ წელს, როცა პოლონეთის საზღვრის უკანონო კვეთას მიგრანტები ბელარუსიდან ცდილობდნენ, რის შედეგადაც რამდენიმე მათგანი დაიღუპა.
  • რუსეთის საავიაციო უწყების ბოლო გადაწყვეტილებამ, პირდაპირი ფრენები დაიწყოს ახლო აღმოსავლეთიდან და ჩრდილოეთ აფრიკიდან კალინინგრადის მიმართულებით, პოლონეთის ხელისუფლება აიძულა, მიეღო ზომები საზღვრის დაცვის გასაძლიერებლად.

დეტალები: პოლონეთის თავდაცვის მინისტრის განცხადებით, კალინინგრადის ბარიერი ისეთივე იქნება, როგორიც ვარშავამ უკვე ააგო პოლონეთი-ბელარუსის საზღვრის გასწვრივ გასულ წელს.

  • 210-კილომეტრიანი სასაზღვრო ბარიერი კალინინგრადის გასწვრივ აშენდება.
  • ბარიერი 2,5 მეტრის სიმაღლის და 3 მეტრის სიღრმის იქნება.
  • მშენებლობა ოთხშაბათს დაიწყება და 2023 წლის ბოლოს დასრულდება.

კონტექსტი: ეს პირველი შემთხვევა არ არის, როცა მეზობელმა ქვეყანამ რუსეთთან ბარიერის აშენება გადაწყვიტა.

  • ოქტომბერში, ფინეთის პრემიერმინისტრ სანა მარინსა და ქვეყნის პოლიტიკურ პარტიებს შორის შედგა შეთანხმება რუსეთის საზღვრის გასწვრივ კედლის მშენებლობასთან დაკავშირებით.
  • ზოგადი უსაფრთხოების გარდა, მიზეზად პუტინის მიერ გამოცხადებული მობილიზაციაც სახელდება, რის შედეგადაც ათასობით რუსი გარბის ქვეყნიდან სხვადასხვა მიმართულებით, მათ შორის ფინეთში.