გადაწყვეტილება პუტინმა რუსეთის ფედერაციის უშიშროების საბჭოს სხდომაზე გამოაცხადა.

დეტალები: უკრაინის ოკუპირებულ ტერიტორიებზე, დონეცკისა და ლუგანსკის ე.წ. სახალხო რესპუბლიკაში, ზაპოროჟიესა და ხერსონის რეგიონებში საომარი მდგომარეობა 2022 წლის 20 ოქტომბრის 00:00 საათიდან შედის ძალაში.

  • პუტინმა აღნიშნა, რომ ამ რეგიონებში რუსეთთან "მიერთებამდე" უკვე არსებობდა საომარი მდგომარეობა და ახლა მნიშნველოვანია ეს რუსეთის კანონმდებლობის ფარგლებში გაფორმდეს.
  • გარდა ამისა, მან გაუზარდა უფლებამოსილება ოთხივე რეგიონის მარიონეტ ხელმძღვანელს.
  • ბრძანება ითვალისწინებს უსაფრთხოების რისკებზე რეაგირების რამდენიმე დონეს, რომლის არჩევასაც ე.წ. ხელმძღვანელები სიტუაციიდან გამომდინარე შეძლებენ.
  • განკარგულება რუსეთის პრეზიდენტის ვებგვერდზე გამოქვეყნდა.

რატომ არის მნიშვნელოვანი: 30 სექტემბერს რუსეთის პრეზიდენტმა უკრაინის ოკუპირებული რეგიონების, ლუგანსკის, ზაპოროჟიესა, ხერსონსა და დონეცკის ანექსია გამოაცხადა.

  • პუტინმა იკადრა და ამ ცერემონიიდანაც მოუწოდა უკრაინას დაუყოვნებლივ შეწყვიტოს ცეცხლი და დაბრუნდეს მოლაპარაკების მაგიდასთან;
  • უკრაინამ კი თქვა, რომ პუტინი ცდილობს ტერიტორიების ხელში ჩაგდებას, რომელსაც ადგილზე ფიზიკურად არც კი აკონტროლებს.
  • საერთაშორისო საზოგადოებამ დაგმო რუსეთის ქმედება და ე.წ რეფერენდუმები არ აღიარა;
  • უკრაინის პრეზიდენტმა კი ხელი მოაწერა განკარგულებას, რომლითაც უკრაინის სუვერენიტეტისა და ტერიტორიული მთლიანობის დამრღვევი აქტები ბათილად ცნო.

ვოლოდიმირ ზელენსკიმ ოფიციალურად თქვა უარი ვლადიმერ პუტინთან მოლაპარაკებებზე — მან ხელი მოაწერა ეროვნული უსაფრთხოებისა და თავდაცვის საბჭოს გადაწყვეტილებას, რომელიც რუსეთის ამჟამინდელ პრეზიდენტთან დიალოგს გამორიცხავს.

  • განკარგულება ამტკიცებს NATO-ში დაჩქარებული წესით გაწევრიანების შესახებ უკრაინის განაცხადსაც;
  • ასევე, პუნქტს, რომლის თანახმადაც, უკრაინამ უსაფრთხოების გარანტიების ისეთი სისტემა უნდა მოამზადოს, რომ რუსეთის აგრესიის მოგერიება გარდაუვალად უზრუნველყოს, გაზარდოს სამხედრო და ტექნიკური დახმარება უკრაინისთვის, რათა ქვეყნის თავდაცვითი შესაძლებლობები გაძლიერდეს;
  • ამასთან, დოკუმენტში რეკომენდაციაა, რომ უკრაინის რადამ იმ კანონპროექტების მიღება დააჩქაროს, რომელიც შესაბამის სანქციებსა და რუსეთის ესკალაციის საპასუხო ქმედებებს ეხება.