საქართველოს პრემიერმინისტრმა და გერმანიის კანცლერმა ქვეყნის ევროპულ პერსპექტივასა და ევროკავშირში გაწევრიანების შესაძლებლობა განიხილეს.

რატომ არის მნიშვნელოვანი: ოლაფ შოლცმა ხაზი გაუსვა, რომ აუცილებელია იმ 12 რეკომენდაციის შესრულება, რომელიც საქართველომ ევროკომისიისგან მიიღო.

  • "12 კრიტერიუმი დასახელებულია, რომელიც აუცილებელია კანდიდატის სტატუსის მისაღებად, ეს არის უკვე ის, რაც ქვეყანამ თვითონ უნდა გააკეთოს, უნდა მიაღწიოს ამას"; [სინქრონული თარგმანი].
  • შოლცა პრაღაში თავისი გამოსვლაც გაიხსენა და აღნიშნა, რომ საქართველოს სამომავლო გაწევრიანებასთან დაკავშირებით თავისი პოზიცია იქ პირდაპირ და მკაფიოდ ჩამოაყალიბა.

დეტალები: ღარიბაშვილმა კანცლერს მხარდაჭერისთვის მადლობა გადაუხადა და ამტკიცებს, რომ მმართველი პარტია ამ რეკომენდაციების შესასრულებლად ყველაფერს გააკეთებს.

  • "ჩვენი მმართველი გუნდი, ჩვენი ხელისუფლება არის აბსოლუტურად მოწოდებული მოტივირებული, რომ ყველა ის 12-ვე რეკომენდაცია, რომელიც განისაზღვრა ევროპული საბჭოს მიერ, იქნას შესრულებული ზედმიწევნით, სრულყოფილად ჩვენი მთავრობის მხრიდან";
  • ღარიბაშვილის თქმითვე, ამ პროცესში მონაწილეობისთვის "კარი გაუღეს" ყველა ოპოზიციურ პარტიას და ქართული პოლიტიკის აქტორებს, ვინაიდან ხელისუფლებას ყველას ჩართულობა "დასჭირდება".

კითხვაზე, რამდენ ხანში წარმოუდგენია საქართველოს ხელისუფლებას ქვეყნის ევროკავშირში გაწევრიანება, ღარიბაშვილი ამტკიცებს, რომ ამ გზაზე თანმიმდევრულები არიან.

  • "ევროპული პერსპექტივა და ევროპული გზა არის ჩვენი ხალხის არჩევანი, ეს არის გზა და პროცესი, რომელიც არის შეუქცევადი და რომელიც ჩვენმა ხელისუფლებამ ბოლო რამდენიმე წლის განმავლობაში მაქსიმალურად დააჩქარა";
  • "რა თქმა უნდა, ეს არ არის დამოკიდებული მხოლოდ სურვილზე, ეს არის დამოკიდებული პროცესზე, რომელსაც ჩვენ ყველანი მაქსიმალური პასუხისმგებლობით მივყვებით";
  • "ჩვენ გვაქვს კონკრეტული გეგმა, თუ როგორ მოვახდინოთ ჩვენი ქვეყნის მოდერნიზაცია, გარდაქმნა, განვითარება, რეფორმების ჩატარება. სწორედ ამას უკავშირდება სწორედ იმ 12 რეკომენდაციის შესრულება, რომელიც მოგვცემს საშუალებას, რომ მივიღოთ ევროპული კანდიდატის სტატუსი";

შოლცმა კი აღნიშნა, რომ ევროკავშირი ყველაფერს აკეთებს, რათა საქართველოს მოცემული რეკომენდაციების შესრულებაში დაეხმაროს, თუმცა საბოლოოდ ისინი თავად ქვეყანამ უნდა შეასრულოს.

  • "მაგრამ ჩვენგან საქართველოს ექნება ყველანაირი მხარდაჭერა იმისთვის, რომ სამართლებრივი და პოლიტიკური ღონისძიებები იქნეს განხორციელებული";
  • "გარდა ამისა, ეკონომიკური განვითარების პერსპექტივების განვითარებაზეა ლაპარაკი, ამიტომაც გვაქვს შესანიშნავი თანამშრომლობა განვითარების პოლიტიკის საქმეში, ამის გაფართოებაც შეიძლება, კიდევ ბევრი სხვა სფეროა სამომავლო განვითარებაში, მაგალითად, ენერგეტიკის სფერო და ამაზე დღეს ჩვენ გვქონდა საუბარი". [სინქრონული თარგმანი]