უკრაინის სამხრეთით მიმდინარე ბრძოლები ახლა მთელი მსოფლიოს ყურადღებას იპყრობს — გთავაზობთ ბოლო ინფორმაციას ოკუპირებული რეგიონიდან.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა — ხერსონის რეგიონში შეიარაღებულმა ძალებმა რუსების თავდაცვის პირველი ხაზი გაარღვიეს.

• ხერსონი რუსეთისთვის სტრატეგიულად მნიშვნელოვანია, რადგან ამ ტერიტორიის დახმარებით ოკუპირებული ყირიმიდან საბრძოლო იარაღისა და პერსონალის მიწოდებას ახდენს.
• რუსების შესვლის პირველივე დღეებიდან, მუქარის მიუხედავად ადგილობრივი მოსახლეობა მუდმივად აწყობდა მასობრივ აქციებს ტანკებისა და შეიარაღებული ჯარისკაცების წინ და გათავისუფლებას ელოდა.
• ხერსონის დაკარგვა დაანგრევს რუსულ მითს ომის წარმატებულად წარმართვაზე, ამიტომ პროპაგანდა ცდილობს, შეტევა კრახისთვის განწირულად შეფუთოს.

ფრონტის ხაზი: უკრაინის თავდაცვის სამინისტროს ინფორმაციით, ფრონტის ხაზი ამჟამად 2,5 ათას კმ-ზეა გადაჭიმული, აქედან 1,3 ათას კილომეტრზე აქტიური საომარი მოქმედებები მიმდინარეობს.

• უწყებაში ამბობენ, რომ დონეცკის მიმართულებით წარმატება აქვთ — წინ მიიწევენ და დასახლებებს ათავისუფლებენ.
• პარალელურად, გრძელდება მძიმე ბრძოლები, რომლის დროსაც თავდაცვის ძალების ქვედანაყოფები მტერს აკავებენ.
• ბოლო ცნობებით, ხერონის ოლქში უკრაინის შეიარაღებულმა ძალებმა გაანადგურეს მტრის კიდევ ორი უპილოტო თვითმფრინავი.

ოკუპანტები: უკრაინის შეიარაღებული ძალების ინფორმაციით, რუსები საშუალებას არ აძლევენ ადგილობრივებს, გადაკვეთონ მდინარე დნეპრი ხიდით ან გადაცურონ და სროლით ემუქრებიან.

• რუსები კი ამბობენ, რომ ხერსონში ანტონოვსკის ხიდი დაზიანდა და მასზე გადაადგილება უსაფრთხოების გამო აიკრძალა.
• ქალაქის საკრებულოს წარმომადგენელი აცხადებს, რომ საოკუპაციო რეჟიმი მასწავლებლებზე ზეწოლას ახდენს და აიძულებს, სკოლებში რუსული პროგრამით ასწავლონ.

"რეფერენდუმი": საოკუპაციო რეჟიმი არ წყვეტს საუბარს უკანონო გამოკითხვის ჩატარებაზე და ცდილობს წარმოაჩინოს, თითქოს რუსეთთან შეერთების მსურველი ბევრია.

• ხერსონის პრორუსული ადმინისტრაცია ამტკიცებს იმასაც, რომ სროლები უკრაინის მხრიდან ხალხს "უზრდის სურვილს რეფერენდუმში მონაწილეობა მიიღოს".
• თუმცა, დღევანდელ განცხადებაში აღნიშნეს, რომ ხმის მიცემის გადადება მოუწევთ და მიზეზად "უსაფრთხოების ზომები" დაასახელეს.

ექსპერტები: აშშ-ის საჰაერო ძალების წარმომადგენლის, ჯასტინ კონელის შეფასებით, ამ კონტრშეტევით დროთა განმავლობაში ისეთი ოპერაცია ფორმირდება, რომელიც მიმართული იქნება რუსული ძალებისა შესუსტებაზე.

• უკრაინის ყოფილი თავდაცვის მინისტრი ანდრეი ზაგოროდნიუკი The Washington Post-თან ამბობს, რომ კონტრშეტევას იმდენი დრო უნდა დასჭირდეს, რამდენიც საჭიროა;
• ბრიტანეთის დაზვერვა წერს, რომ უკრაინის შეიარაღებულმა ძალებმა მათ სასარგებლოდ გამოიყენეს რუსეთის არმიაში არსებული ლოგისტიკური და ხელმძღვანელობითი სისუსტეები.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.