ამასთან დაკავშირებით განცხადებას საპარლამენტო ოპოზიციური პარტიების და დამოუკიდებელი დეპუტატების ნაწილი ავრცელებს, რომელთა შორის არიან: სტრატეგია აღმაშენებელი, ნაციონალური მოძრაობა, ლელო, რესპუბლიკური პარტია, თამარ კორძაია, თაკო ჩარკვიანი, არმაზ ახვლედიანი, შალვა შავგულიძე და ნატო ჩხეიძე.

რატომ არის მნიშვნელოვანი: საქართველო ერთადერთი აღოჩნდა ასოცირებულ ტრიოს შორის, ვინც კანდიდატის სტატუსის ნაცვლად რეკომენდაციები მიიღო, რომელთა შესრულების შემთხვევაში, კომისია სამომავლო სტატუსზე იმსჯელებს.

  • რეკომენდაციებს შორის ერთ-ერთი მთავარი დეპოლარიზაცია და დეოლიგარქიზაცია იყო, თუმცა ოპოზიცია და მმართველი გუნდი იმაზეც ვერ შეთანხმდნენ, ვინ არის ოლიგარქი და როგორ უნდა იმუშაონ რეკომენდაციებზე.

განცხადებაში ოპოზიცია სწორედ ამაზე ამახვილებს ყურადღებას და ამბობს, რომ ქართულმა ოცნებამ თავიდანვე დააყენა 3 კონკრეტული დათქმა, რომელიც ფუნდამენტურად ეწინააღმდეგება ევროკომისიის რეკომენდაციების შესრულებას.

  • მაგალითებად კი იმას ასახელებენ, რომ მმართველი გუნდი ბიძინა ივანიშვილს ოლიგარქად არ აღიარებს და ამ სტატუსს მედიის დამფუძნებლებს ანიჭებს.
  • მეორე დათქმა ისაა, რომ ხელისუფლება არც სასამართლო კლანის არსებობას და სისტემის პრობლემებს აღიარებს.
  • ხოლო მესამე შარლ მიშელის რეკომენდაციების უგულებელყოფა და ისიც, რომ დეპოლარიზაციად მედიისა და ოპოზიციის გაჩუმება მიაჩნიათ.

დეტალები: ხელმომწერები განიხილავენ ქართული ოცნების ბოლოდროინდელ ქმედებებს და განცხადებებს — ელჩების და პარტნიორების კრიტიკას, პროპაგანდას მეორე ფროტნის გახსნაზე, სამუშო ჯგუფში ISFED-ის ჩართვაზე უარის თქმას და რიგგარეშე სესიისთვის გამოცხადებულ ბოიკოტს.

  • მათი თქმით, ამ ყველაფრის შემდეგ მოუწიათ, ხელისუფლებისგან დამოუკიდებლად სამუშაო პროცესის დაწყება საჭირო ინიციატივების მოსამზადებლად.
  • ამბობენ, რომ ზაფხულში არასამთავრობო სექტორის ჩართულობით მოამზადეს რეკომენდაციების შესრულებისთვის საჭირო სათანადო გადაწყვეტები და საკანონმდებლო ინიციატივები თორმეტივე მიმართულებით.
  • მათივე შეფასებით, ინიციატივების დიდი ნაწილი თანხვედრაშია არასამთავრობო სექტორის ხედვებთან და შეესაბამება ევროკომისიის, ვენეციის კომისიის, ეუთო/ოდირის და სხვა საერთაშორისო ორგანიზაციების რეკომენდაციებსა და დასკვნებს.

დაგეგმილია ფინალური შეხვედრები დეოლიგარქიზაციის, სასამართლო, საარჩევნო და მედია საკითხების მიმართულებით.

  • მომდევნო კვირაში, საბოლოო შეჯერების შემდეგ, ოპოზიცია დოკუმენტს გაასაჯაროებს;
  • სექტემბრის ბოლომდე კი შესაბამის კანონპროექტებს დააინიცირებენ.

პაპუაშვილის განცხადებით, ოპოზიციის ნაწილი 12 რეკომენდაციის შესრულებაში საკუთარი დღის წესრიგის შემოტანას ცდილობს.

  • მისი თქმით, ოპოზიციის რადიკალურ ნაწილს არ აწყობს, რომ საქართველომ კანდიდატის სტატუსი მიიღოს.