ფოთში, ჟურნალისტ და სამოქალაქო აქტივისტ ელისო ჯანაშიას თავს დაესხნენ და ფიზიკური შეურაცხყოფა მიაყენეს. შემთხვევა გუშინ მოხდა.

ჯანაშიას თქმით, სოციალურ საწარმო, ლიმენაში "ქართული ოცნების" აქტივისტი ნინელი კულონავა თავს დაესხა და ფიზიკური შეურაცხყოფა მიაყენა.

"მოვიდა გამიზნულად. წინასწარ იცოდა, რომ აქ ახალგაზრდული სივრცეა და შესაბამისი ტექსტებიც ჰქონდა მომზადებული. იგინებოდა, ლანძღავდა ახალგაზრდებს: რად გინდათ ევროპაო [...] ევროკავშირის დროშაც გქონდათ აქ და რად გინდათ ეს დროშაო. გარყვნილების ბუდე გაქვთო. მე ამ ხმაურზე გამოვედი. რუსეთი გვაჭმევს, გვახურავს და თქვენ კიდევ ევროპა გინდათო [...] ამ ახალგაზრდებს ლანძღავდა... ჩავრთე კამერა. ამის შემდეგ მითრია თმებით და ბღუჯა თმა ამაგლიჯა. გამაყუჩებელი დავლიე, მაგრამ სკალპი მტკივა. დაზიანებულია. 40 წუთი ვიყავი სასწრაფოში", — უთხრა ჯანაშიამ NEWS.On.ge-ის

ჟურნალისტის გავრცელებულ კადრებში ჩანს აგრესიული მოქალაქე, რომელიც ჯანაშიას თავს ესხმის და ფიზიკურ შეურაცხყოფას აყენებს.

მისივე ცნობით, ის მანამდე თავდამსხმელ ნინელი კულანავას არ იცნობდა და არანაირი დაპირისპირება არ ჰქონია. როგორც სოციალური საწარმოს დამფუძნებელი ამბობს, აქვს ინფორმაცია, რომ ნინელი კულანავა და მისი ქმარი 2012 წლიდან „ქართული ოცნების“ აქტივისტები არიან.

NEWS.On.ge კომენტარისთვის შსს-ს დაუკავშირდა. თუმცა უწყებაში ჯერ_ჯერობით კომენტარს არ აკეთებენ.