ევტუშენკოვისთვის ქონების ჩამორთმევაზე ინფორმაციას უკრაინის ანტიკორუფციული ცენტრი ავრცელებს.

რატომ არის მნიშვნელოვანი: ევტუშენკოვი რუსი ოლიგარქია, რომელიც ვლადიმერ პუტინთან არის აფილირებული. მას, ასევე, კონტაქტები აქვს ქართველ ბიზნესმენებთან, მათ შორის, ბიძინა ივანიშვილთან, დავით ხიდაშელთან და ლევან ვასაძესთან.

  • აპრილში სავარაუდოდ ვლადიმირ ევტუშენკოვისა და ბიძინა ივანიშვილის სატელეფონო საუბრის ჩანაწერის გავრცელების შემდეგ, სადაც ბიზნესგეგმებს განიხილავდნენ, გაჩნდა ეჭვები, რომ ისინი სანქციებისთვის გვერდის ავლას ცდილობენ.
  • გავრცელებული ჩანაწერების შემდეგ, უკრაინის უმაღლესი რადას ფრაქცია ხალხის მსახურის თავმჯდომარემ, დავით არახამიამ ევროკავშირსა და აშშ-ს მოუწოდა, ივანიშვილის მიმართ სანქციების დაწესება განიხილონ.

რა ქონება ჩამოერთვა ევტუშენკოვს: ოლიგარქს ჩამოართვეს 17 უძრავი ქონების ობიექტი საერთო ფართობით თითქმის 100 000 კვადრატული მეტრი, ასევე წილები რამდენიმე უკრაინულ კომპანიაში.

  • კერძოდ, 42,09% შპს "ელექტროზავოდ-ვიტში"; 59,2% შპს "ITM-Ukraine"-ში;
  • 59,2% შპს "Smart Digital Solutions"-ში;
  • 42.09% "ZTZ-Service"-ში;
  • 34,21% სს "უკრაინის კვლევითი დიზაინისა და ტრანსფორმატორების მშენებლობის ტექნოლოგიური ინსტიტუტში".

ვინ არის ევტუშენკოვი: ის და ალი უზდანოვი, გავრცელებული ჩანაწერების სავარაუდო ფიგურანტი, რუსეთში ერთ-ერთი ყველაზე მსხვილი საინვესტიციო ჰოლდინგის AFK სისტემას ხელმძღვანელები არიან.

  • 1998-2006 წლებში ძალადობრივი ჯუგუფის ხელმძღვანელს, ლევან ვასაძე AFK სისტემას კომპანიის სტრატეგიისა და განვითარების ვიცე-პრეზიდენტის თანამდებობა ეჭირა.
  • 2014 წელს, როცა ევტუშენკოვის წინააღმდეგ ფულის გათეთრების ბრალდებით საქმე იყო აღძრული, თავად პუტინმა განაცხადა, რომ მას ბრალი მოეხსნა.
  • 2018 წლის სექტემბერში კი პუტინმა ევტუშენკოვს მადლობა გამოუცხადა "მიღწეული სამსახურებრივი წარმატებებისა და მრავალწლიანი კეთილსინდისიერი მუშაობისთვის".