საქართველოში აშშ-ის ელჩი, კელი დეგნანი აცხადებს, რომ სახალხო დამცველის შერჩევა უაღრესად მნიშვნელოვანია და პარლამენტს აქვს უდიდესი შანსი, რომ ეს პროცესი ინკლუზიური იყოს.

რატომ არის მნიშვნელოვანი: ევროკავშირის მიერ გაცემულ 12 რეკომენდაციაში, ერთ-ერთი სახალხო დამცველის გამჭვირვალედ და დემოკრატიულად არჩევას უკავშირდება.

  • მამუკა მდინარაძის განცხადებით, საპარლამენტო უმრავლესობა სახალხო დამცველის კანდიდატურას არ წარადგენს.

კელი დეგნანის თქმით, ახლა მაქსიმალურად მრავალფეროვანი ხმების ჩართვის დროა და არა პროცესის დახურვის.

  • "ძალიან მნიშვნელოვანია აღინიშნოს, რომ წინა შერჩევის პროცესმა მაღალი შეფასება დაიმსახურა იმ საერთაშორისო ორგანიზაციების მხრიდან, რომლებიც აკვირდებიან სახალხო დამცველის შერჩევას".
  • ელჩი ამბობს, რომ თუ საქართველოს სურს შეინარჩუნოს ეს მაღალი შეფასება, უნდა დაიცვას პრინციპები, რომლებიც საქართველოს 5 წლის წინ გადაეცა და გათვალისწინებულია საუკეთესო საერთაშორისო პრაქტიკის სახით, პარიზის პრინციპებით და რეკომენდაციებით.
  • "უნდა გვახსოვდეს, რომ სახალხო დამცველის მთავარ ამოცანას თითოეული საქართველოს მოქალაქის ადამიანის უფლებების დაცვა წარმოადგენს. ეს უაღრესად მნიშვნელოვანი სამუშაოა, რომელიც ითხოვს მიუკერძოებელ პირს, სათანადო კვალიფიკაციითა და ყველა მხარის აღიარებით".

მამუკა მდინარაძის თქმით, საპარლამენტო უმრავლესობა კანდიდატს მხოლოდ იმ ერთადერთ შემთხვევაში წარადგენს, თუ ოპოზიციური სუბიექტების მხრიდან პროცესი ხელოვნურად დაიბლოკება კანდიდატების არწარდგენის გზით.

  • პარტიის აღმასრულებელი მდივანის განცხადებით, კანდიდატის შეფასების ზოგადი კრიტერიუმები გაიწერება და შეიქმნება საფუძველი, რომ პარლამენტის თავმჯდომარემ გამოსცეს საგანგებო ბრძანება, სადაც განისაზღვრება კანდიდატების შეფასების წესი.
  • მდინარაძე ამბობს, რომ დღეს და გუშინ საპარლამენტო ოპოზიციის, სამოქალაქო სექტორის წარმომადგენელთან გაიმართა შეხვედრები, მათი პოზიციების გათვალისწინებით კი მიიღეს ეს გადაწყვეტილებები.