საგარეო საქმეთა მინისტრის მოადგილე დავით დონდუა საქართველოში ევროკავშირის ელჩთან შეხვედრის შემდეგ აცხადებს, რომ ჰერბერტ ზალბერის განცხადებებზე ბრიუსელისგან რეაგირებას ელის.

გუშინ სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლისა და ჟენევის საერთაშორისო მოლაპარაკებების თანათავმჯდომარე ჰერბერტ ზალბერი ცხინვალის რეგიონში ჩავიდა და ოკუპირებული სამხრეთ ოსეთის ე.წ. პრეზიდენტს, ანატოლი ბიბილოვს, "წარმატებულად ჩატარებულ არჩევნებში" გამარჯვება მიულოცა.

ევროკავშირის ელჩი საქართველოში იანოშ ჰერმანი სწორედ ამ ინციდენტის შემდეგ იყო დაბარებული საგარეო საქმეთა სამინისტროში იყო დაბარებული.

"სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლისა და ჟენევის საერთაშორისო მოლაპარაკებების თანათავმჯდომარის მხრიდან მსგავსი განცხადებების გაკეთება, რაც ჩვენ დღეს მოვისმინეთ საინფორმაციო საშუალებებით, ყოვლად მიუღებელია და ეწინააღმდეგება ევროკავშირის პოლიტიკასა და პოზიციას საქართველოს სუვერენიტეტსა და ტერიტორიულ მთლიანობასთან დაკავშირებით" - აცხადებს დონდუა.

დავით დონდუას განცხადებით, ევროკავშირის პოზიცია საქართველოს სუვერენიტეტისა და ტერიტორიულ მთლიანობის მხარდაჭერასთან დაკავშირებით მკაფიოდაა გაცხადებული მის არაერთ განცხადებასა თუ ოფიციალურ კომენტარში, მათ შორის, ოკუპირებული ცხინვალის რეგიონში ჩატარებულ ე.წ. არჩევნებისა და რეფერენდუმის თაობაზე და საქართველოს ოკუპირებულ ტერიტორიებზე რუსეთის ფედერაციის ქმედებებთან დაკავშირებით.