ევროკომისიის რეკომენდაციის შემდეგ მმართველ პარტიაში გამართულ ბრიფინგზე ირაკლი კობახიძეს ევროკომისიის დასკვნაში ნახსენებ დეოლიგარქიზაციაზე ჰკითხეს.

რატომ არის მნიშვნელოვანი: საქართველოს მიმართ ევროკომისიის მოთხოვნების ერთ-ერთი პუნქტი სწორედ ამას ეხება, თუმცა არ არის დაკონკრეტებული, ვის გულისხმობენ.

  • მანამდე, ევროპარლამენტარების რეზოლუციაში ერთ-ერთი ყველაზე მნიშვნელოვანი ნაწილი ბიძინა ივანიშვილისთვის სანქციების დაწესების მოწოდებას და მის კრემლთან ურთიერთობას ეხებოდა.

რა თქვა კობახიძემ: მას მიაჩნია, რომ ევროკომისია მიხეილ სააკაშვილსა და დავით კეზერაშვილს გულისხმობდა და ივანიშვილი ოლიგარქი კი არა, ფილანთროპი და ქველმოქმედია.

  • "რა თქმა უნდა, ვერავითარი ფაქტით და არგუმენტით ეს ვერ იქნებოდა ნაგულისხმევი და არც არის ნაგულისხმევი".

როგორია ევროკომისიის დასკვნა საქართველოზე: ასოცირებული ტრიოს ქვეყნებს შორის, საქართველო ერთადერთია, რომელმაც ევროკავშირის კანდიდატის წევრობის სტატუსის მიღებაზე ევროკომისიისგან რეკომენდაცია ვერ მიიღო.

  • ურსულა ფონ დერ ლაიენის განცხადებით, საქართველო იზიარებს იმავე მისწრაფებასა და პოტენციალს, რასაც მოლდოვა-უკრაინა და მის აპლიკაციას აქვს ძალა.
  • თუმცა ევროკომისიის პრეზიდენტის თქმით, იმისთვის, რომ საქართველომ წარმატებას მიაღწიოს, ქვეყანა პოლიტიკურად უნდა გაერთიანდეს, შეიმუშაოს მკაფიო გზა სტრუქტურული რეფორმებისთვის.
  • "ამიტომ ჩვენ გავცემთ რეკომენდაციას, რომ მიეცეს ევროპული პერსპექტივა, მაგრამ დავბრუნდეთ, რათა შევაფასოთ, კანდიდატის სტატუსის მინიჭებამდე რამდენად აკმაყოფილებს მთელ რიგ პირობებს".