"ბრიტანეთის მხრიდან ხდება თვითნებური, სამართლებრივი საფუძვლის არმქონე გადაწყვეტილებების მიღება, რომელზეც მე დიდი ეჭვი მაქვს, რომ არის პოლიტიკური ვენდეტით ნაკარნახევი", — ამის შესახებ ოცნების პარლამენტის თავმჯდომარემ, შალვა პაპუაშვილმა ბრიტანეთის მიერ ბიძინა ივანიშვილის შესაძლო სანქცირებაზე დასმულის კითხვის საპასუხოდ განაცხადა.

ჟურნალისტმა მას ჰკითხა: "ბიძინა ივანიშვილი თუ ახლა მოიგებს დავას — 6-7 მლნ დოლარს, შესაძლოა, ეს ფული მაინც ვერ მიიღოს. ეშინია მას ამ თანხის დაკარგვის?"

შალვა პაპუაშვილი: [საერთაშორისო სამართლის დარღვევას] უკიჟინებენ არა მხოლოდ რუსეთს (და ამას სწორად აკეთებენ), ჩაიხედონ სარკეში და დაინახონ საერთაშორისო სამართლის დამრღვევები. როდესაც საერთაშორისო სამართალს არღვევენ სხვადასხვა სახელმწიფო, პოლიტიკოსი, ეს შემდეგ მორალურ უპირატესობას ართმევს მათ.

ჟურნალისტი: რუსეთს ადარებთ დიდ ბრიტანეთს, ბატონო შალვა?

შალვა პაპუაშვილი: რუსეთიც სახელმწიფოა და დიდი ბრიტანეთიც სახელმწიფოა, ერთგან რუსულად საუბრობენ, მეორეგან — ინგლისურად.

ჟურნალისტი: მეტ განსხვავებას ვერ ხედავთ მათ შორის?

შალვა პაპუაშვილი: რუსეთი ჩვენი ოკუპანტია, ბრიტანეთი — არა. არსებობს სხვაობებიც და თანხვედრებიც. თანხვედრა არის ის, რომ ბრიტანეთის მხრიდან ხდება თვითნებური, სამართლებრივი საფუძვლის არმქონე გადაწყვეტილებების მიღება, რომელზეც მე დიდი ეჭვი მაქვს, რომ არის პოლიტიკური ვენდეტით ნაკარნახევი იმის გამო, რომ 2024 წლის არჩევნებში ქართველმა ხალხმა აირჩია ქართული ოცნება. გაბრაზდა ამაზე ზოგიერთი. ნაცვლად იმისა, რომ შეეგუონ, არის პოლიტიკური ვენდეტა, — განაცხადა შალვა პაპუაშვილმა.